Qazaqstan Prezidenti Qasym-Jomart Toqaev Batys Qazaqstan oblysynyń jurtshylyǵymen kezdesti, dep habarlaidy "Ult aqparat" Aqordaǵa silteme jasap.
Jiynǵa ziialy qaýym, ardagerler men kásipodaq uiymdary jáne jastar ókilderi, máslihat depýtattary, memlekettik qyzmetshiler qatysty.
Memleket basshysy óńirdiń elimizdi órkendetýge qosqan úlesi men damý erekshelikterine toqtaldy.
– Qazaqstannyń damýyna oń yqpalyn tigizetin mańyzdy ólkege erekshe kóńil bólinedi. Oblystyń geografiialyq jaǵdaiy, tabiǵi bailyǵy men óndiristik bazasy óńirdiń órkendeýine qolaily. Búginde Aqjaiyq aimaǵy biraz salalar boiynsha eleýli jetistikterge qol jetkizip otyr, – dedi Qasym-Jomart Toqaev.
Qazaqstan Prezidenti aýyl sharýashylyǵy áleýeti joǵary óńirde agroóndiristik keshendi damytý úshin Úkimet pen jergilikti ákimdikke tapsyrma berdi.
– Et eksportynyń kórsetkishi óte jaqsy. Degenmen, osy saladaǵy eńbek ónimdiligi tómendegen. Bul máseleni Úkimetpen birlesip, júieli túrde sheshý qajet, – dedi Memleket basshysy.
Qazaqstan Prezidenti oblysta áleýmettik nysandar men turǵyn úi qurylystarynyń qarqynyn arttyrýdy tapsyrdy.
– Sheteldik investitsiia esebinen eki birdei alys aýdannyń ortalyǵyna dene shynyqtyrý jáne saýyqtyrý keshenin salý jumystary bastaldy. Bul – óte jaqsy kórsetkish. Ákimdikke Jastar jyly aiasynda barlyq aýdandardy osyndai dene shynyqtyrý keshenderimen qamtamasyz etýdi tapsyramyn. Sonymen qatar, turǵyn úi qurylysynyń qarqynyn arttyrý qajet. Qurylys barysyn qatań baqylaýdy oblys ákimine tapsyramyn. Áleýmettik jaǵdaiy nashar jáne turmysy tómen kópbalaly otbasylardy baspanamen qamtýdy júieli túrde retteý kerek, – dedi Memleket basshysy.
Qasym-Jomart Toqaev óńirdegi aýyz sý máselesin shuǵyl sheshý qajettigin atap ótti.
– Taza aýyzsý máselesi áli de ózekti bolyp otyr. Eldi mekenderdiń 45 paiyzy ǵana ortalyqtandyrylǵan taza aýyzsýmen qamtamasyz etilgen. Oblys ákimine Úkimetpen birlesip, 2020 jyly bul kórsetkishti 80 paiyzǵa deiin jetkizýdi tapsyramyn, – dedi Qazaqstan Prezidenti.
Memleket basshysy aimaqtyń kólik-logistikalyq áleýetine erekshe toqtalyp, jergilikti joldardyń sapasyn arttyrýdyń mańyzdy ekenin atap ótti.
– Óńirdegi jol problemasy áli de kún tártibinen túspei tur. Oblystyq mańyzy bar joldardyń 70 paiyzynyń sapasy syn kótermeidi. Bul azamattardyń kúndelikti ómirinde qiyndyq týǵyzady, sonymen qatar, óńirdiń eksporttyq jáne tranzittik áleýetin tómendetedi. Elbasynyń tapsyrmasyna sáikes, Orynbor tas jolyn jóndeý jumystary, ońtústiktegi – Kaztalov, Jánibek jáne Bókei ordasy aýdandarynda jol qurylysy bastalǵanyn bilemin. Úkimetke jergilikti ákimdikpen birlesip, 2021 jyldyń sońyna deiin osy jumystardy aiaqtaýdy tapsyramyn. Bul másele meniń jeke baqylaýymda bolady, – dedi Qasym-Jomart Toqaev.
Memleket basshysy oblystaǵy tozyǵy jetken elektr jelilerine nazar aýdardy.
– Oblystyń elektr jelileri tozǵan. Sol sebepti aýdandarda jaryqtyń jii sónýi baiqalady. Mundai ózekti máseleler sheshilmei, investitsiia tartý jáne jańa jumys ornyn ashý týraly oilaýǵa bola ma? Osy problemalardy Úkimetpen birlesip, júieli túrde sheshýdi qolǵa alý kerek, – dedi Qazaqstan Prezidenti.
Qasym-Jomart Toqaev ashyqtyq pen jariialylyqty odan ári damytýdy tapsyrdy.
– Barlyq deńgeidegi ákimder azamattardyń ótinishterine der kezinde, kidirissiz jaýap berýi qajet. «Ashyq ákimdik» jobasy – osy úshin jasalǵan alǵashqy qadam. Memlekettik organdardyń jumysy «qyzmet úshin adam» emes, «adam úshin qyzmet» qaǵidatyna beiimdelýi kerek, – dedi Memleket basshysy.
Jiyn sońynda, Qazaqstan Prezidenti elimizdiń áleýmettik-ekonomikalyq jáne mádeni damýyna qosqan úlesi úshin «Stroikombinat» jaýapkershiligi shekteýli seriktestiginiń direktory B.Nurbaevty, «Avtokombinat» jaýapkershiligi shekteýli seriktestiginiń direktory V.Goloýhovty, Oblystyq perinataldyq ortalyǵynyń bas dárigeri N.Dmitrienkony jáne Syrym aýdany Q.Myrzaliev atyndaǵy orta mekteptiń tarih pániniń muǵalimi G.Nuǵmanovany alǵys hattarmen marapattady.
