Qazaqstan Prezidenti Elordany damytý jóninde birqatar naqty tapsyrma berdi, dep habarlaidy "Ult aqparat" Aqordaǵa silteme jasap.
Qasym-Jomart Toqaev sońǵy 10 jylda Elordaǵa tartylǵan investitsiia kóleminiń azaiyp ketkenine nazar aýdardy. Memleket basshysy qala ákimdigi men Syrtqy ister ministrligine osy baǵyttaǵy jumysty jandandyryp, jýyq arada naqty nátijelerge qol jetkizýdi tapsyrdy.
– Nur-Sultan ekonomika men biznes ortaǵa qolaily jaǵdai jasaityn qala bolyp qala berýi qajet. Basty mindetterdiń biri – investitsiia tartý, – dedi Prezident.
Qasym-Jomart Toqaev ózekti máselelerdiń biri retinde baspana berý men qurylys jumystarynyń báseńdeýin atady.
– Úleskerlik qurylys máselesin tez arada sheshý kerek. Qalada 49 problemalyq nysan bar. Ondaǵy qurylystyń aiaqtalýyn 13,5 myń úlesker taǵatsyzdana kútip otyr, – dedi Memleket basshysy.
Prezident energetika salasyndaǵy nysandar qurylysynyń ýaqytyly aiaqtalmaýyn atap aitty. Qurylysy 2010 jyly bastalyp, biyl aiaqtalýy tiis JEO-3-tiń paidalanýǵa berilý merzimi keiinge shegerilgenin mysalǵa keltirdi. Qasym-Jomart Toqaev qalanyń «Saryarqa» gaz qubyryna qosylýǵa daiyn bolmaýyn da synǵa aldy.
Sondai-aq Memleket basshysy biznestiń damýyna kedergi keltirip otyrǵan injenerlik júielerge qosylýdyń qiyndyǵyna nazar aýdardy.
– Kóp jaǵdaida kommýnikatsiiaǵa qosylýǵa tehnikalyq múmkindigi joq jer telimderi aýktsionǵa shyǵarylady nemese aldyn ala jazylǵan tehnikalyq talaptar qurylys barysynda ózgerip jatady. Buǵan jol berýge bolmaidy. Beriletin jer telimderi barlyq júielerge qosylýǵa daiyn bolýy kerek, – dep tapsyrdy Prezident.
Qasym-Jomart Toqaev qolma qol aqshasyz esep aiyrysý úlesin arttyrý qajettigin aitty. Qazir Elordada ol nebári 9 paiyzdy quraidy.
– Atalǵan problema qala turǵyndary men qonaqtaryna jaisyz jaǵdai týǵyzyp qana qoimai, «kóleńkeli ekonomikanyń» óristeýine ákep soǵady. Qarjy ministrligi qala ákimdigimen birlesip qaladaǵy saýda núkteleri men qyzmet kórsetý salalaryndaǵy baqylaý-kassalyq apparattardy, kartalyq terminaldardyń bolýyn qatań baqylaýǵa alýy qajet, – dedi Memleket basshysy.
Prezident azyq-túlik jáne kúndelikti tutyný taýarlarynyń qymbattyǵyna nazar aýdardy. Onyń oiynsha, baǵanyń qymbattyǵy – infraqurylym men azyq-túlik beldeýiniń nasharlyǵy, saýda oryndarynyń jetispeýshiliginiń aiǵaǵy.
Qasym-Jomart Toqaev Nur-Sultan qalasy men Aqmola, Qaraǵandy, Pavlodar oblystarynyń ákimdikterine taýar óndirýshilermen jáne saýda jelilerimen tikelei bailanys ornatýdy tapsyrdy.
Memleket basshysy óz sóziniń basym bóligin qala turǵyndarynyń áleýmettik turmys jaǵdaiyn jaqsartýǵa arnady. Onyń oiynsha, ishki migratsiialyq protsesterge baqylaýdyń bolmaýynan jyl saiyn qala halqynyń sany artyp, ol óz kezeginde áleýmettik infraqurylymǵa, sonyń ishinde meditsina men bilim salasyna salmaq túsirýde.
Prezident bilim berý uiymdarynda oryn jetispeýshiligin aitty. Ol mektepter men mektepke deiingi bilim berý mekemelerindegi oryn tapshylyǵyn sheshý úshin jekemenshik áriptestikti kóbirek tartýdyń mańyzdylyǵyn aitty.
Qasym-Jomart Toqaev meditsinalyq qyzmettiń sapasyn arttyrýdy da atap ótti. Bul turǵyda 60 jyldan beri kúrdeli jóndeý júrgizilmegen Ortalyq temirjol aýrýhanasynyń apatty jaǵdaiyn mysalǵa keltirdi.
Sonymen qatar Memleket basshysy sporttyq nysandardyń qala turǵyndary úshin qoljetimdi bolýy úshin qajetti sharalar uiymdastyrýdy, «Qazaqstan» jáne «Tolqyn» sport keshenderinde qaita jóndeý jumystaryn júrgizýdi tapsyrdy.
Prezident Elordada turǵyndarynyń ómir súrýine meiilinshe qolaily jaǵdai jasaý kerektigine kóńil bóldi. Prezidenttiń paiymdaýynsha, Nur-Sultan – «shekarasyz qala» qaǵidatymen damýy qajet. Negizgi mindet – jol salý jáne jóndeý, ortalyq kommýnikatsiialardy tartý, shetki kósheler men «Michýrino», «Internatsionalnyi», «Kúigenjar» eldi mekenderin jaryqtandyrý.
Qasym-Jomart Toqaev qala turǵyndarynyń qozǵalysyn qamtamasyz etý máselesin de ainalyp ótpedi. Bul turǵyda Memleket basshysy jeńil relsti kólik (LRT) qurlysyn synǵa aldy.
– Úkimet pen ákimdikke LRT qurlysyn qaita bastaý jáne birinshi kezeńiniń aiaqtalý merzimin naqty belgileýdi, sonymen qatar, ekinshi kezeńniń kestesi men júzege asyrý tetikterin aiqyndaýdy tapsyramyn, – dedi Prezident.
Sondai-aq Memleket basshysy Úkimet pen ákimdikke kóshelerdegi kólik keptelisin azaitý maqsatynda qalanyń intellektýaldyq kólik júiesiniń tiimdiligin qamtamasyz etetin sharalar qabyldaýdy tapsyrdy. Naqty aitqanda, Qasym-Jomart Toqaev Saraishyq jáne Saryarqa kóshelerindegi keptelisti azaitý úshin Esil ózeni arqyly Táýelsizdik dańǵylyna deiin kópir salýdy usyndy.
Prezident Nur-Sultan aǵylshyn tilinde qyzmet kórsetetin halyqaralyq ortalyq retinde dami berýi kerek dedi.
– Sheteldik sarapshylar men investorlarǵa aǵylshyn tilinde «bir tereze» qaǵidaty boiynsha qyzmet kórsetýdi uiymdastyrý kerek. Ol úshin qala ákimdigi «Astana» halyqaralyq qarjy ortalyǵy Ekspat ortalyǵynyń múmkindigi men tájiribesin paidalanýy tiis, – dedi Memleket basshysy.
Qasym-Jomart Toqaev Elordanyń qarqyndy damýy úshin turǵyndarynyń qaýipsizdigin qamtamasyz etý máselesi de ózekti ekenin aitty.
– Jyl basynan beri balalardyń terezelerden, balkonnan qulaý saldarynan 14 tosyn jaǵdai tirkeldi. Qurylys normalarynda qaýipsizdiktiń naqty parametrlerin kúsheitý qajet dep sanaimyn, – dedi Prezident.
Memleket basshysy qalanyń birqatar problemalaryna toqtalyp, olardy sheshý jóninde naqty tapsyrma berdi.
