Memleket basshysy Qasym-Jomart Toqaev buqaralyq aqparat quraldary qyzmetkerlerin kásibi merekesimen quttyqtady, - dep habarlaidy "Ult aqparat" Aqordanyń resmi saityna silteme jasap.
"Qurmetti jýrnalister! Buqaralyq aqparat quraldarynyń qyzmetkerleri! Sizderdi kásibi merekelerińizben shyn júrekten quttyqtaimyn!
Aqparat salasynda jumys isteý – úlken mártebe ári zor jaýapkershilik. Otandyq baspasóz elimizdiń tutastyǵy men tatýlyǵyn nyǵaitý jolynda eleýli ról atqarady. Sóz ónerin qasiet tutyp, abyroi biiginen kórinip júrgen kásibi jýrnalisterimiz az emes. Olar eseli eńbegimen oqyrmannyń, kórermenniń alǵysyna bólenýde. Bul – el igiligi jolyndaǵy adal ári qajyrly eńbekterińizge berilgen baǵa.
Búginde áleýmettik jelilerde, internette jalǵan aqparat kóbeiip ketkenin kórip otyrmyz. Osyndai kúrdeli jaǵdaida sizderdiń shynaiy ári syni kózqarastaryńyz túrli keleńsizdikke tosqaýyl bolar edi. Qazir qoǵamdaǵy basymdyqtar ózgerip jatyr. Kásibi jýrnalister qyzmetiniń mańyzy arta tústi.
Biz Jańa, Ádiletti Qazaqstandy qurýǵa kiristik. Bul – barsha otandasymyzdyń aldynda turǵan mańyzdy mindet. Sizderdiń maqalalaryńyz ben siýjetterińiz, jýrnalistik zertteýlerińiz osy bastamaǵa úles qosary sózsiz. Sondyqtan naǵyz kásibi mamandardyń eńbegin laiyqty baǵalaýdyń simvoldyq máni bar.
Mirjaqyp Dýlatulynyń "Qai jurttyń baspasózi myqty bolsa, sol eldiń ózi de kúshti" degen tujyrymy búgin de barynsha ózekti. Elimizdiń aqparattyq qaýipsizdigi men ideologiialyq derbestigin saqtaý úshin otandyq jýrnalisterdiń Qazaqstanda jáne álemde bolyp jatqan úderister týraly óz kózqarasy bolýy kerek. Biz qoǵamǵa úlgi-ónege kórsetip, memleket isin ilgeriletýge atsalysýymyz qajet. Óitkeni halyqtyń senimin aqtaý – azamattyq boryshymyz.
Biz tatýlyq pen birlikti saqtai otyryp, Jańa Qazaqstandy qurý jolynda jańa belesterdi birge baǵyndyratynymyzǵa senemin. Barshańyzǵa shyǵarmashylyq shabyt, tolaǵai tabys tileimin!" - delingen hatta.
