Memleket retteitin baǵalardy belgileý kezindegi jemqorlyqty joiý qajet. Bul týraly QR Prezidenti Qasym-Jomart Toqaevtyń sybailas jemqorlyqqa qarsy is-qimyl jónindegi keńeste sóilegen sózinde aitty, dep habarlaidy QazAqparat.
«Byltyr elimizde baǵa kúrt kóterildi. Árine, álemniń barlyq memleketinde infliatsiia deńgeii joǵary boldy. Degenmen, tiisti ýákiletti organdar baǵany belgilegen kezde onyń qanshalyqty negizdi ekenin muqiiat qaraýy kerek. Munyń astarynda ekonomikalyq sebepten bólek, bireýdiń jymysqy áreketi jatqan joq pa degen saýal týyndaidy. Mysaly, otandyq ónim óndirýshiler temir jol salasyn jemqorlyq jailaǵanyn aityp, únemi shaǵymdanady.
Kásipkerler naqty bir nysanǵa aparatyn temir joldy paidalanǵany úshin tóleitin aqynyń kólemine bailanysty narazylyq bildirýde. Osyǵan orai, bir ýaqytta birneshe óńirden – Qostanai, Shyǵys Qazaqstan, Túrkistan, Aqmola jáne Pavlodar oblystarynan aryz túsken. Monopolist kompaniialar baǵany óz betimen eselep ósirgen. Bul halyq tutynatyn taýarlardyń baǵasyna birden áser etedi.
Men bir jyl buryn Básekelestikti qorǵaý agenttigine Bas prokýratýramen birlesip, osy máselemen ainalysýdy tapsyrdym.
Biraq, «Baiaǵy jartas – bir jartas» kúiinde qaldy. Keibir adamdardyń tutynýshy men kásipkerdiń esebinen ǵana paida taýyp otyrýy durys emes. Prezident Ákimshiligine bul máseleni baqylaýǵa alýdy tapsyramyn.
Monopolisterdiń zańsyz tapqan tabysyn qaitaryp, atqarylǵan jumystar jóninde maǵan baiandańyzdar. Óz paidasy úshin ózgelermen sybailasqan sheneýnikter bar ma, sony da anyqtaý kerek. Jalpy, baǵany qoldan ósirýge múldem jol bermeý qajet», - dedi Memleket basshysy.
