Memleket basshysy Básekelestikti qorǵaý jáne damytý agenttiginiń tóraǵasy Serik Jumanǵarindi qabyldady, dep habarlaidy "Ult aqparat" Aqordaǵa silteme jasap.
Qasym-Jomart Toqaevqa áleýmettik mańyzy bar azyq-túlik taýarlary naryǵyndaǵy ahýaldy turaqtandyrý úshin qabyldanyp jatqan sharalar týraly esep berildi.
Prezidentke Qazaqstandaǵy birja saýdasynyń damýy, qurylys materialdary, turǵyn úi, janar-jaǵar mai naryqtaryndaǵy baǵaǵa qatysty ahýal, sondai-aq, kirme joldar naryǵyndaǵy jaǵdaidy turaqtandyrý jóninde málimet berildi.
Serik Jumanǵarin Qasym-Jomart Toqaevqa memlekettik jáne jeke operatorlardyń qyzmetine taldaý júrgizý jónindegi tapsyrmasynyń oryndalý nátijeleri týraly baiandady. Sondai-aq, jumys istep turǵan qazirgi qurylymdardy ońtailandyrý jónindegi usynystaryn aitty. Boljam boiynsha olar 3,5 milliard teńge ekonomikalyq paida ákeledi.
Sonymen qatar Memleket basshysyna farmatsevtika, avtojoldar qurylysy naryqtaryndaǵy, densaýlyq saqtaý salasyndaǵy monopoliiaǵa qarsy áreket etý sharalary týraly aityldy. Salalyq vedomstvonyń jetekshisi Prezidentke básekelestiktiń damýyna kedergi keltiretin shekteýlerdi joiý úshin Aýyl sharýashylyǵy ministrligimen birlesip qabyldap jatqan sharalar, Ulttyq joba jáne básekelestikti damytý jónindegi zań jobasy boiynsha atqarylyp jatqan jumystar jaiynda aitty.
Qasym-Jomart Toqaev azyq-túlik jáne basqa da taýarlardyń baǵasyn tómendetý jóninde júieli sharalar qabyldaýdy tapsyrdy. Atap aitqanda Qasym-Jomart Toqaev negizgi azyq-túlik óndirisi kólemin ulǵaitý, otandyq taýar óndirýshilerge memlekettik qoldaý sharalarynyń qoljetimdiligin qamtamasyz etý, halyqtyń áleýmettik jaǵdaiy nashar toptaryna qoldaý kórsetý qajet dep sanaidy.
