Prezident Qasym-Jomart Toqaev Aziia aimaǵynyń jaǵdaiy men osy óńirdiń áleýetine bailanysty pikir bildirdi, dep habarlaidy QazAqparat.
«Meniń kásibi mansabym Aziia aimaǵymen tikelei bailanysty boldy, iaǵni osy aýmaqta uzaq ýaqyt oqýda boldym ári qyzmet ettim. Sonda osy ejelgi, erekshe ári uly mádenietke jáne órkenietke shynaiy qurmetpen qaradym. Sondyqtan Aziia óńiri jáne onymen bailanysty barlyq jaǵdai meniń tyńǵylyqty nazarymda. Sonymen qatar, halyqaralyq sarapshylar Aziia ǵasyrynyń kelgenin moiyndady», - dedi Prezident «Mir» telearnasyna bergen suhbatynda.
Osy oraida Memleket basshysy Aziia aimaǵynda iri ulttyq ekonomikalar ornalasqanyn, Aziia elderi halyqaralyq saýda men tehnologiialyq revoliýtsiiany, investitsiiany yntalandyryp otyrǵandyǵyndyǵyn atap ótti.
Sonymen qatar Qasym-Jomart Toqaev Aziia-Tynyq muhity aimaǵyndaǵy jaǵdaiǵa pikir bildirdi. Jahandyq oiynshylar arasyndaǵy básekelestik, tarihtyń kúrdeli kezeńderin túsindirý men shekaralar ainalasyndaǵy daýlar, sondai-aq qazirgi álemdegi pandemiianyń taralý qaýpi men osy indettiń keri saldary jáne ózge de faktorlar turaqsyz kontinentaldyq qarqyndy qalyptastyryp jatyr.
Ózara senimniń jetispeýiniń jarqyn úlgisi retinde saýda, valiýta ári tehnologiialyq máseleler boiynsha qytailyq-amerikalyq daýlardy atap ótýge bolady. Bul ahýal Qytai men AQSh arasyndaǵy geosaiasi qatynastar sapasyna, aimaqtyq qaýpsizdik máselelerine jáne basqa da salalarǵa tikelei áser etedi.
Osy oraida Memleket basshysy Qazaqstannyń únemi aldyn alý doplomatiiasyn ustanyp kelgenin jáne bul ustanymdy jalǵastyratynyn atap ótti.
«Shyǵysta tiimdi qaýipsizdik arhitektýrasyn qurý Batyspen ózara is-qimylsyz múmkin emes ekeni anyq. Qazaqstan birneshe márte Aziiadaǵy ózara is-qimyl jáne senim sharalary jónindegi keńes pen EQYU arasynda ózara árekettesýdi retteýdi usyndy, iaǵni bul qadam igi ister úshin qos forýmnyń áleýetin paidalanýǵa kerek», - dedi Qasym-Jomart Toqaev.
Sóz sońynda Prezident Qazaqstan árbir eldiń ulttyq egemendigin qurmetteýdi, daýlardy beibit jolmen sheshýdi basty nazarǵa alatynyn qadap aitty.
