Prezident Qasym-Jomart Toqaev elimizde sybailas jemqorlyqqa qarsy belsendi kúres júrip jatqanyn aitty, - dep habarlaidy "Ult aqparat" Aqordanyń baspasóz qyzmetine silteme jasap.
«Biz sybailas jemqorlyqqa qarsy belsendi kúres júrgizip jatyrmyz. Bul – elimiz úshin óte ózekti, qajetti másele. Qazaqstan jemqorlyqpen kúrestiń negizgi kórsetkishteri boiynsha aitarlyqtai alǵa basty. Halyqaralyq reiting agenttikteri osylai dep baǵalap otyr.
Biraq, toqmeiilsip otyrýǵa bolmaidy. Ókinishke qarai, jemqorlyq – jurttyń sanasyna sińip, ábden ádetke ainalyp ketken. Bul – ashy bolsa da, shyndyq» - dedi Memleket basshysy.
Prezidenttiń aitýynsha, halyqtyń ashýyn túsinýge bolady.
«Azamattarymyz saiasi qoldaýǵa ie bolǵan keibir adamdardyń shekten tys baiyp ketetinine narazy. Oǵan qosa, olar bailyqtarynyń qomaqty bóligin shetel asyryp áketken. Halyqtyń ashýyn túsinýge bolady.
Sondyqtan meniń Jarlyǵymmen Arnaýly mekemearalyq komissiia quryldy. Komissiianyń mindeti – shetelge zańsyz shyǵarylǵan qarjyny elge qaitarý. Bul – óte kúrdeli jumys, uzaqqa sozylýy múmkin. Sebebi, kóptegen zańdyq protsedýradan ótý kerek. Biraq, biz qalai bolsa da, bul máselemen muqiiat ainalysýymyz qajet. Áitpese, ádiletti qoǵam týraly sóz qozǵaýdyń ózi qiyn bolady» - dedi Toqaev jiynda.
Sondai-aq, ol barlyq salada bárine birdei múmkindik beretin naǵyz ádil qoǵam qurý kerektigin tilge tiek etti.
«Onyń bir joly – táýelsiz sot júiesi.
Babalarymyz «Týra bide týǵan joq degen» degen sózdi tegin aitqan joq. Biz qara qyldy qaq jarǵan biler jolyn jalǵastyrýǵa tiispiz. Qazirgi tańda elimizde úsh júzge jýyq sýdia jetispeidi. Sol oryndarǵa ádil, adal jáne bilikti jastardy tartýymyz qajet. Men myqty kásibi zańgerlerdi Ádiletti Qazaqstandy birge qurýǵa shaqyramyn» - dedi Memleket basshysy.
