Memleket basshysy Qasym-Jomart Toqaev Aýǵanstan Prezidenti Ashraf Ǵanimen telefon arqyly sóilesti, dep habarlaidy Aqorda.
Aýǵan tarapynyń bastamasymen telefon arqyly sóilesken Qasym-Jomart Toqaev pen Ashraf Ǵani bir-birin qasietti Oraza ait merekesimen quttyqtady. Memleket basshysy dostas aýǵan halqyna beibitshilik pen baq-bereke tiledi.
Prezidentter AQSh pen NATO áskerleriniń Aýǵanstan jerinen shyǵarylyp jatqan kezdegi ahýal jaiynda pikir almasty. Eldegi saiasi-diplomatiialyq jaǵdaidy aýǵandyqtardyń ózin qatystyra otyryp, beibit jolmen retteýden basqa balama jol joq ekeni naqtylandy.
Qasym-Jomart Toqaev Qazaqstannyń Aýǵanstandy terrorizmnen jáne zańsyz esirtki tasymalynan ada, birtutas, beibit, beitarap el retinde qalyptastyrý jolynda barynsha kómek kórsetýge daiyn ekenin jetkizdi. Osy maqsatta eki el úkimetteri arasyndaǵy ekonomikalyq jáne gýmanitarlyq yntymaqtastyqtyń naqty máselelerin jedel sheshýge baǵyttalǵan dialogty jandandyrý kerek.
Ashraf Ǵani aýǵanishilik dialogty dáiekti túrde qoldaǵany jáne óz eline naqty gýmanitarlyq kómek kórsetkeni úshin Qazaqstanǵa rizashylyǵyn bildirdi. Ol Qasym-Jomart Toqaevtyń eki memleket arasyndaǵy yqpaldastyq máselelerin sheshýde iskerlik tásildi qoldanýdyń mańyzdylyǵy jónindegi pikirimen kelisti. Sonymen qatar Ashraf Ǵani Aýǵanstandaǵy ahýaldy retteýge jumyldyrylǵan halyqaralyq kúsh-jigerge Qazaqstannyń belsendi aralasýyn óte mańyzdy dep sanaidy.
