Qazaqstannyń Tuńǵysh Prezidenti Nursultan Nazarbaev táýelsizdik alǵan jyldary Qytaimen shekara máselesi qalai sheshilgenin aitty, - dep habarlaidy "Ult aqparat".
Elbasynyń aitýynsha, belgilengen shekarań bolmasa, memleketti táýelsiz dep esepteýge bolmaidy.
"Tájikstan men Qyrǵyzstan arasyndaǵy sheshilmegen birneshe shaqyrym jer soǵysqa ákelip otyr. Ázerbaijan men Armeniia da solai. Myńdaǵan mysal keltirýge bolady.
Kezinde shekara úshin Keńes Odaǵy men Qytai arasynda qaqtyǵys bolyp, kóp adam qaza tapqan. Keiin Shyǵys Qazaqstandaǵy shekarada da qaqtyǵys bolyp, kóptegen adam mert boldy. Shekara máselesi sheshilmeýi memleket úshin óte qaýipti", - dedi Nazarbaev "Shtrihi k portretý" derekti filminde.
Onyń sózinshe, Qytai men Qazaqstan arasyndaǵy shekara máselesi boiynsha kelissóz 12 jylǵa sozylǵan.
"Basynda Qytaimen shekaralasatyn Resei, Qazaqstan, Qyrǵyzstan men Tájikstan - tórt el birigip, osy máseleni keshendi túrde sheshpek boldyq. Kelissóz kóptegen jyl boiy júrdi. Táýelsizdik jyldaryn eseptesek, 12 jyl kelissóz boldy. Basqalar týraly aitpai-aq qoiaiyn, ózimizge keler bolsaq, Qytaimen shekara týraly tóraǵa Tszian Tszeminmen birge qujatqa qol qoidym", - dedi Elbasy.
Onyń aitýynsha, sol kezde belgilenbegen shekara máselesine Qazaqstannyń qazirgi Prezidenti Qasym-Jomart Toqaev aralasqan.
"Belgilenbegen birneshe shaqyrymdyq shekara qaldy. Kartografikalyq analogy saqtalmaǵan, biz ony taptyq, biraq sipattamasynda Qytaidyń, ne Keńes Odaǵynyń jeri ekeni jazylmaǵan. Osy máselege tap boldyq ta, sony zerdelei bastadyq. Tastaq jer, tóbe ǵana, ainalada eshteńe joq. Ony burǵylap kórdik. Qazba bailyqtary bar ma, joq pa, ony da kórdik. Bolmady. Qoi baǵýǵa da kelmeidi. Biraq jerdiń aty jer ǵoi. Sodan pikir talastyrdyq, daýlastyq. Sol kezde Toqaev delegatsiia quramynda edi jáne basqalarmen salystyrǵanda jaqsy jumys istedi. Sóitip, bir sheshimge keldi de, kelisimge qol qoidy", - dedi Nazarbaev.
