Qazaqstan Prezidenti Qasym-Jomart Toqaevtyń tóraǵalyǵymen halyqty áleýmettik qorǵaý máseleleri jóninde keńes ótti, dep habarlaidy "Ult aqparat" Aqordaǵa silteme jasap.
Jiynǵa Premer-Ministr Asqar Mamin, Prezident Ákimshiliginiń Basshysy Baqytjan Saǵyntaev, Ulttyq bank tóraǵasy Erbolat Dosaev, Premer-Ministrdiń birinshi orynbasary – Qarjy ministri Álihan Smaiylov, Premer-Ministrdiń orynbasary Gúlshara Ábdiqalyqova, Prezident Ákimshiligi Basshysynyń birinshi orynbasary Darhan Káletaev, Prezidenttiń ekonomikalyq máseleler jónindegi kómekshisi Timýr Súleimenov, Eńbek jáne áleýmettik qorǵaý ministri Berdibek Saparbaev qatysty.
Qasym-Jomart Toqaev ádiletti áleýmettik saiasattyń airyqsha mańyzy, ásirese, aýyr jaǵdaiǵa tap bolǵan adamdarmen qatynasty qalyptastyrýda ekenin atap ótti. Sondai-aq, Qazaqstan Prezidenti tsifrlyq platformany qoldana otyryp, biryńǵai áleýmettik kartany keshiktirmei engizý qajettigin aitty.
Keńes barysynda Eńbek jáne áleýmettik qorǵaý ministriniń ataýly áleýmettik kómek kórsetý jaǵdailary jónindegi esebi tyńdaldy.
– Osy mańyzdy salada halyqtyń jaǵdaiyn jaqsartýǵa múmkindik beretin aýqymdy jumystar júrgizilýde. Sonymen qatar, ataýly áleýmettik kómek kórsetý sharalary kezinde zań buzýshylyqtar, tipti, alaiaqtyq joldar da anyqtaldy. Bul biýdjet úshin josparlanbaǵan shyǵyn, – dep baiandady Berdibek Saparbaev.
Jiyn qorytyndysy boiynsha Memleket basshysy atalǵan saladaǵy teris áreketterdi joiý úshin Eńbek jáne áleýmettik qorǵaý ministrine ataýly áleýmettik kómektiń berilý tártibin retteý jóninde shuǵyl sharalar qabyldaýdy tapsyrdy, sondai-aq, Prezident Ákimshiligi men Úkimetke birqatar naqty tapsyrma berdi.
