Memleket basshysy Qasym-Jomart Toqaev Parlament Senatynyń Tóraǵasy Máýlen Áshimbaevty qabyldady, dep habarlaidy "Ult aqparat" Aqordanyń resmi saityna silteme jasap.
Prezident Senat Spikerimen Parlamenttiń jańa sessiiasynyń ashylýyna daiyndyq máselelerin talqylady. Sondai-aq Prezidentke Joǵarǵy Palatanyń ótken sessiiadaǵy zań shyǵarý qyzmetiniń negizgi qorytyndylary týraly aqparat berildi.
Senat Tóraǵasynyń aitýynsha, depýtattyq korpýs saiasi reformalardyń jiyntyǵyn zań turǵysynan tolyq qamtamasyz etti. Halyq densaýlyǵy, pedagog mártebesi, ardagerler týraly mańyzdy zańdar jáne pandemiia kezinde azamattar men biznesti qoldaýǵa baǵyttalǵan túzetýler jan-jaqty pysyqtalyp, qabyldandy. Aldaǵy sessiia barysynda Senat qyzmeti Qazaqstandy daǵdarystan keiingi kezeńde damytý strategiiasyn iske asyrýǵa baǵyttalady.
Máýlen Áshimbaev Qasym-Jomart Toqaevqa ótken senat depýtattaryn sailaýdyń qorytyndylary, senatorlardyń óńirlerge sapary jáne aǵymdaǵy qyzmeti týraly málimet berdi.
Memleket basshysy ekonomikalyq ósimdi qaita qalpyna keltirýge jáne halyqtyń turmys sapasyn kóterýge baǵyttalǵan bastamalardy zań turǵysynan sapaly jáne jedel iske asyrý qajet ekenin aitty.
Prezident Senattyń róli árbir zańnamany jiti pysyqtaý, sondai-aq zańdardy qabyldaý kezinde memlekettiń basty ustanymdaryn jáne jalpy ulttyq múddelerdi qoldaý ekenin atap ótti.
Qasym-Jomart Toqaev sybailas jemqorlyqty joiý jáne turǵyndardyń memlekettik apparatqa degen senimin arttyrýǵa baǵyttalǵan jańa bastamalardy zańmen bekitýdiń mańyzdylyǵyna nazar aýdardy.
