Qazaqstan Prezidenti Qasym-Jomart Toqaev qaiyrymdylyq, volonterlik uiymdardyń jáne biznes-sektordyń ókilderimen onlain formatta kezdesý ótkizdi, dep habarlaidy Aqorda.
Memleket basshysy óz sózinde qaiyrymdylyq pen volonterliktiń pandemiia kezinde jalpyulttyq sipat alǵanyn atap ótip, onyń áleýmettik normaǵa ainalǵanyn jáne halyqtyń durys qabyldaǵanyn aitty. Qasym-Jomart Toqaev osyndai qiyn-qystaý kezde syrt qalmai, otandastaryna kómek qolyn sozǵan, meiirimdilik, izgilik tanytqan ár azamatqa rizashylyq bildirdi.
«Asar degen ata dástúrimizdi saqtap kele jatqanymyz qýantady. Pandemiia kezinde de eriktiler aianbai eńbek etip, eren erliktiń úlgisin kórsetti. Olar kúndiz-túni dárigerlermen jáne tártip saqshylarymen birlesip, indetpen kúresti. Qaiyrymdy jandar ortaq iske jan-jaqty qoldaý bildirdi. Elbasynyń bastamasymen qurylǵan «Biz birgemiz» qorynyń jumysyn erekshe atap ótkim keledi. Bul igi bastamaǵa myńnan astam azamat qarjylai úles qosty. Biz osyndai uiymshyldyqtyń jáne jaýapkershiliktiń arqasynda ahýaldy turaqtandyra aldyq. Munyń bári – eldiktiń jáne bereke-birliktiń jarqyn kórinisi», – dedi Prezident.
Qasym-Jomart Toqaev volonterlik qyzmetti damytý, qaiyrymdylyq pen metsenattyqqa qoldaý kórsetý memleketimizdiń uzaq merzimdi basymdyǵy dep sanaidy. Volonterlik ispen ainalysý – patriotizmniń jarqyn kórinisteriniń biri. Memleket basshysy jariialaǵan Volonter jyly azamattarymyzdyń kópshiligin qaiyrymdy is qozǵalysy tóńiregine toptastyrdy. Qazaqstandyqtardyń usynysy boiynsha jasalǵan kóptegen qaiyrymdylyq jáne volonterlik jobalar – sonyń dáleli.
«Qaiyrymdylyqqa tikelei jáne janama túrde atsalysatyn adamdardyń sany turaqty artyp kele jatqanyn kórip otyrmyz. Qyzmetkerlerdiń volonterlik jumysyn eńbek kitapshasyna mindetti túrde tirkeý týraly sheshim qabyldandy. Budan bólek volonterlikpen ainalysqan jastarǵa ýniversitetke, kolledjge túsý kezinde birqatar basymdyq beriledi. Qazirgi tańda bul jaqsy nátije dep esepteimin. Barshańyzdyń buǵan eleýli úles qosqandaryńyz sózsiz», – dedi Qasym-Jomart Toqaev.
Memleket basshysy eriktilerdiń, qaiyrymdylyq qorlardyń pandemiiaǵa qarsy kúres kezinde úlken ról atqarǵanyn eskere otyryp, BUU Bas Assambleiasy 75-sessiiasynyń jalpysaiasi debattarynda Volonterlerdi jumyldyrýdyń halyqaralyq kúnin jariialaý týraly usynǵan bastamasy qoldaý taýyp, júzege asatynyna senim bildirdi. Onyń pikirinshe, Qazaqstan volonterlik pen qaiyrymdylyqty damytý isinde ozyq halyqaralyq úrdisterden qalyp qoimaidy. Volonter jyly osy baǵytqa tyń serpin berdi.
«Volonterlik qyzmet osy jylmen toqtap qalmaidy, aldaǵy ýaqytta da jalǵasa beredi. Óitkeni volonterlik qyzmet memlekettiń aldyna qoiyp otyrǵan maqsattarymen úndesetin bolǵandyqtan, bul – rýhty kóteretin, halyqtyń muń-muqtajyn bólisetin qozǵalys», – dedi Prezident.
Qazirgi ýaqytta Qasym-Jomart Toqaevtyń tapsyrmasy boiynsha túsinikti ári tiimdi quqyqtyq mehanizmderdi qamtityn Qaiyrymdylyq týraly zań ázirlenýde.
«Qaiyrymdylyq jáne volonterlik uiymdar ózderiniń eńbek etýine, sonyń ishinde memleketpen jáne biznespen birlese jumys isteýine qajetti jaǵdai jasaityn zań júzinde shynaiy mártebege ie bolýy tiis. Úkimetke bul máseleni pysyqtaý tapsyryldy. Memlekettik qyzmet kórsetýdiń, infraqurylymdy paidalanýdyń, aqparattyq qoldaý kezinde jeńildikter berýdiń naqty tetikterin ázirleýdiń máni zor. Sonymen qatar salyqtyq jeńildikter máselesi de mańyzdy», – dedi Prezident.
Búginde qaiyrymdylyq jobalarǵa baǵyttalǵan iri biznes tabysyn 3% jáne shaǵyn jáne orta biznes tabysyn 4% kólemde salyqtan bosatý zańnamalyq turǵyda qarastyrylǵan. Biraq shaǵyn jáne orta biznes bul jeńildikterdi paidalanbai otyr. Qasym-Jomart Toqaev atalǵan jaǵdaiǵa taldaý jasap, osy baǵytta tiisti jumys júrgizýge tapsyrma berdi. Biznestiń qaiyrymdylyqqa qarjy aýdarýy yńǵaily ári tiimdi bolýǵa tiis.
«Qaiyrymdylyq qorlarǵa qarjy túsýiniń jáne onyń ári qarai jumsalýynyń ashyq bolýyn qamtamasyz etý qajet. Bul baǵytta kúńgirttikke jol bermeý kerek. Qazir qaiyrymdylyq jasaityn azamattar men kómek alýshylardyń reestrin qurý bastamasy iske asyrylýda. Bul mindettiń barynsha naqty oryndalýyna múmkindik jasaǵan jón. Qaiyrymdylyq jobalar arqyly ótetin barlyq qarjynyń jumsalýyna aqparattyq jáne qoǵamdyq baqylaýdy qamtamasyz etý qajet», – dedi Memleket basshysy.
Prezident jeke qaiyrymdylyqtyń barlyq túri damýy kerek dep sanaidy. Ár adamnyń bastama kóterip, óz qarjysyn qaiyrymdylyq maqsatqa bóle alatyn júie qurylýǵa tiis.
«Ókinishke qarai, tiisti aqparattyq jumystar talapqa sai jolǵa qoiylmaǵan, adamǵa senim uialatatyn tetikter jasalmaǵan. Keide buqaralyq aqparat quraldarynan azamattarymyz kimge jáne qalai kómektesýge bolatynyn bilmeidi degen aqparatty estip qalamyz. Al eger azamattarymyz mundai jumyspen ainalysatyn bolsa, olardyń qaiyrymdylyq qarjysy qai maqsatqa paidalanylatynyn naqty bilý kerek», – dedi Qasym-Jomart Toqaev.
Onlain formatta ótken kezdesýde «Birgemiz» qoǵamdyq qorynyń basqarma tóraǵasy, «Qazaqstandyq «Ýaqyp» qory» korporativtik qaiyrymdylyq qorynyń prezidenti Rýslan Saqiev, «Kaspi Bank» AQ basqarma tóraǵasy Mihail Lomtadze, «BTS Digital» JShS-niń basshysy Nurtai Ábilǵaliev, «Dara» jeke qorynyń atqarýshy direktory Ainur Aimurzina, «Men almatylyqpyn» qoǵamdyq birlestiginiń jetekshisi Konstantin Avershin, Qazaqstan halqy Assambleiasynyń múshesi, volonter Nargizam Mahmýdova sóz sóiledi.
Olar biznestiń áleýmettik jaýapkershiligi, qaiyrymdylyq salasyn damytýǵa yntalandyrý, qaiyrymdylyq qyzmettiń ashyqtyǵyn, volonterlerdiń rólin arttyrý jáne volonterlikti damytý máselelerine bailanysty oilaryn ortaǵa saldy.
Memleket basshysy Úkimet janyndaǵy Qaiyrymdylyqty damytý máseleleri jónindegi keńeste aitylǵan barlyq máseleni, bastamalardy pysyqtaýǵa, sondai-aq, Qazaqstan zańnamasyna tiisti ózgerister engizýdi keshiktirmeýge tapsyrma berdi.
Kezdesý sońynda birqatar azamat pandemiia kezindegi qajyrly eńbegi úshin «Halyq Alǵysy» medalimen marapattaldy.
