Memleket basshysy 24 maýsymda Arys qalasynda bolǵan tótenshe jaǵdai kezinde jáne qarý-jaraq qoimasyndaǵy jarylystyń saldaryn joiý barysynda erekshe kózge túsken elimizdiń azamattaryna memlekettik nagradalar tapsyrdy. «Aqorda» rezidentsiiasynda ótken saltanatty jiynda 40 adam marapattaldy, dep habarlaidy "Ult aqparat".
Qasym-Jomart Toqaev óz sózinde turǵyndardy qutqarýǵa jáne Arys qalasyn qaita qalpyna keltirýge atsalysqan barlyq azamatqa rizashylyq bildirdi.
Prezident 24 maýsym halqymyzdyń taǵy bir synaqtan súrinbei ótken kúni retinde tarihta qalatynyn aityp, Arys turǵyndarynyń tynyshtyǵy buzylǵanymen, eldiń rýhy túspegenin aitty.
"Qaiǵyly jaǵdai eshkimdi bei-jai qaldyrmady. Arys qalasyn búkil el bolyp qalpyna keltirdik. Buǵan Qazaqstannyń ár turǵyny úles qosty. Patriotizm men shynaiy kómektiń osyndai jarqyn úlgisiniń negizinde jastarymyzdy tárbieleýimiz kerek", – dedi Memleket basshysy.
Prezidenttiń aitýynsha, syn saǵatta biraz azamat sabyrlyq tanytyp, eren erliktiń úlgisin kórsete bildi.
"Mysaly, kólik júrgizýshisi Asqar Ábdihalyqov "Lider" balabaqshasyndaǵy 70 balany qaterden qutqardy. Al medbike Kúmisai Tumanova aýrýhanada emdelip jatqan balalardy qaýipsiz aimaqqa jetkizdi. Olar sol sátte ózderiniń ómirine de qaýip kelerin oilamastan táýekelge bas tikti. Men turǵyndardy qaýipsiz jerge kóshirgen azamattarǵa zor rizashylyǵymdy bildiremin. Zardap shekkenderdi emdep, olardyń ómiri úshin kúresken dárigerlerge alǵys aitamyn", - dep atap kórsetti Toqaev.
Budan bólek, Prezident aǵa serjant Nurjan Baqtybaidyń erligin erekshe atap ótti. Ol órttiń saldaryn joiý kezinde batyl áreket etti. Sonyń arqasynda biraz adam aman qaldy.
"Ondai adamdar kóp. Árbireýi erlik men tabandylyq tanyta bildi. Al bapker ári oqytýshy Evgenii Hismetov Qaraǵandy oblysynan óz erkimen keldi. Ol birneshe ýchaskede jumys istedi. Gýmanitarlyq kómek taratty, qurylys jumystaryn atqardy. Sóitip, júzdegen eriktimen birge qalany qalpyna keltirýge óz úlesin qosty", - dedi Toqaev.
Prezidenttiń aitýynsha, kásipker Berik Qanievtiń aqshasyna qalanyń tutas bir kóshesi jóndeldi. Osyndai patriottyq mysaldar barshylyq.
"Arysty qalpyna keltirýge 10 myńǵa jýyq adam men 250 kompaniia atsalysty. 300 arnaiy tehnika tartyldy. Búginde nysandardyń 97 protsenti aiaqtaldy. Ómirzaq Estaiuly Shókeevtiń basshylyǵyndaǵy Túrkistan oblystyq ákimdigininiń qyzmetkerlerine, ardagerlerge, dárigerlerge, áskeri qyzmetkerge alǵys aitqym keledi. Asqar Uzaqbaiuly Mamin bastaǵan Úkimet biraz sharýa jasap shyqty ", - deidi Toqaev.
Osydan keiin Arys qalasyn qalpyna keltirýge úles qosqan azamattarǵa II jáne III dárejeli "Aibyn" men "Qurmet" ordenderin, "Erligi úshin", "Jaýyngerlik erligi úshin" jáne "Shapaǵat" medaldary tabystaldy. Olardyń ishinde áskeri azamattar, dárigerler, kásipkerler men eriktiler bar.
Memleket basshysy qazirgi ýaqytta nysandardyń 97 paiyzynyń qaita qalpyna keltirý jumystary aiaqtalǵanyn, eń aldymen, kóp balaly otbasylardyń baspanalary qalpyna keltirilgenin habarlady. 1 qyrkúiek kúni 16 mektep 12 myń oqýshyny qabyldady, onyń 2,5 myńy - birinshi synypqa barǵan búldirshinder.
Qazaqstan Prezidenti sóziniń sońynda Arys oqiǵasy halqymyzdyń qiyn-qystaý kezdegi bekem birligi men yntymaǵyn kórsetkenin aitty.
- Shyn máninde, búgingi jiynǵa qatysyp otyrǵan azamattar – naǵyz batyrlar. Al, osy zalǵa kele almaǵandardyń bári ordendermen jáne medaldarmen marapattalatyn bolady, - dep qorytyndylady Memleket basshysy.
