Memleket basshysy Qasym-Jomart Toqaev «ArselorMittal Temirtaý» AQ metallýrgiia kombinatyndaǵy myryshpen jáne aliýminiimen qaptaý tsehynyń jumysymen tanysty, dep habarlaidy "Ult aqparat" Aqordaǵa silteme jasap.
Kásiporynnyń atqarýshy direktory Vadim Basin Prezidentke óndiris protsesin uiymdastyrý jáne jabdyqtaý jumysynyń qaǵidalary týraly aitty.
Tseh myryshpen qaptalǵan oramdy jáne tabaqsha ónimderin óndiredi. Tsehtyń jalpy óndiristik qýaty jylyna 700 myń tonna ónim shyǵarýǵa jetedi.
Memleket basshysy tsehtyń daiyn ónimderi men jumys júktemesin qarap kórdi. Myryshpen qaptalǵan tabaqshalarǵa konstrýktsiialyq materialdar óndirisi men qurylysta suranys joǵary. Metallýrgiia óndirisindegi bul ónimniń qosymsha quny qymbat.
«ArselorMittal Temirtaý» AQ bas direktory Nair Bidjý Memleket basshysyna kásiporyndy odan ary damytý perspektivasy, jańa koks bateriiasy qurylysynyń jospary, ekologiialyq qaldyqtardy azaitý jóninde qabyldanyp jatqan sharalar jaiynda málimet berdi.
– Bul - qazaqstandyq metallýrgiiadaǵy kóshbasshy kásiporyn. Munda Qazaqstannyń Tuńǵysh Prezidenti Nursultan Ábishuly Nazarbaev óziniń eńbek jolyn bastaǵan. Biz óndiris qýatyn arttyrýdy maqsat etip otyrmyz. Maǵan jańa investitsiialyq jobalar, óndiristi jańǵyrtý, áleýmettik jaǵdaidy jaqsartý jaiynda baiandady. Kásiporynnyń aldynda turǵan mindetter az emes. Sondyqtan ony retine qarai sheshý kerek. Ol jaiynda buǵan deiin Premer-Ministrmen sóilestim. Jańa oblys ákimimen de birqatar máseleni talqyladyq. Barlyq máseleni aqyryndap sheshý qajet, – dedi Qazaqstan Prezidenti.
Sonan soń Qasym-Jomart Toqaev metallýrgiia zaýytynyń eńbek ujymymen áńgimelesip, jumystaryna tabys tiledi.
