Foto: Akorda.kz
Prezident Búkilarmiialyq keńes ótkizdi, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaevqa aldymen áskeri qyzmetshilerdiń biryńǵai kiim úlgisi tanystyryldy. Budan keiin Memleket basshysy – Qazaqstan Qarýly Kúshteri Joǵarǵy Bas qolbasshysy Búkilarmiialyq keńes ótkizip, ardagerler men sarbazdardy Otan qorǵaýshy kúnimen quttyqtady.
Joǵarǵy Bas qolbasshy quttyqtaý sózinde Qarýly Kúshterimiz memlekettigimizdiń myzǵymas tiregi, týǵan eldiń táýelsizdigin jáne beibit ómirin qorǵaý qasietti paryz ekenin atap ótti.
– Týǵan jerdiń aýmaqtyq tutastyǵyn saqtaý – qasterli borysh. Batyr babalarymyz ǵasyrlar boiy jeriniń shetin jaýǵa bastyrmai, bizge miras etti. Osy uly murany kózdiń qarashyǵyndai saqtaý – basty mindetimiz. Birtutas ári qýatty memleketti urpaqqa tabystaý – negizgi maqsatymyz. El ishi tynysh, qoǵam turaqty bolsa, jasampaz ári órkenietti memleketke ainalamyz. Iaǵni, damyǵan el bolamyz desek, eń aldymen, beibitshilik jáne tynyshtyq kerek. Qarýly Kúshterimiz osy qasterli qundylyqtardy qorǵaýǵa tiis, – dedi Memleket basshysy.
Prezident búginde zamannyń kúnde qubylyp jatqanyna jáne álemde jappai qarýlaný beleń alǵanyna nazar aýdardy.
– «Jaý joq deme, jar astynda» degen sóz bar. Qazirgi kúrdeli kezeńde Armiianyń róli kúsheie tústi. Armiia egemendigimizdi qorǵaýǵa árdaiym daiyn bolýy qajet. Onyń kásibi daiyndyǵy, zamanaýi qarý-jaraqpen, ozyq tehnologiiamen jabdyqtalýy basty faktorǵa ainaldy. Áskerdiń bilikti bolýy jáne utqyrlyǵy urys nátijesine tikelei áser etedi. Armiia osy talapqa sai bolsa, óz mindetin oidaǵydai atqarady, – dedi Qasym-Jomart Toqaev.
Joǵarǵy Bas qolbasshy kúshtik qurylymdardyń jańa talapqa sai bolýy qajet ekenine nazar aýdardy. Onyń aitýynsha, qazir arnaiy operatsiialar kúshteriniń qolbasshylyǵy quryldy. Sondai-aq desanttyq-shabýyldaýshy áskerdiń qarym-qabiletin arttyrý úshin naqty jumys júrgizilip jatyr.
– Aýmaqtyq qorǵanystyń áleýeti kúsheitilýde. Azamattyq qorǵanys bólimsheleri qurylyp jatyr. Arnaiy jasaq bólimderin damytý isi tyń qarqynmen jalǵasýda. Osy jumystyń bárin ýaqtyly aiaqtaý kerek. Olar birtindep qajetti jabdyqtarmen qamtamasyz etilýge tiis. Memlekettik organdardyń tyǵyz qarym-qatynasta bolýy óte mańyzdy. Sonda ǵana biz kez kelgen qaýip-qaterge tótep bere alamyz. Qýatty armiia – turaqtylyq pen tynyshtyqtyń kepili, – dedi Prezident.
Qasym-Jomart Toqaev armiiany tehnologiialyq turǵyda jańǵyrtý jumysy jalǵasatynyn atap ótti. Onyń paiymynsha, jańa úlgidegi qarý-jaraqtyń jáne tehnikanyń, ásirese dáldigi joǵary qarýlardyń, ushqyshsyz basqarylatyn tehnika men robotty keshenderdiń úlesin arttyrý qajet. Sondai-aq áskerimiz utqyr bolý úshin tasymaldaýshy ushaqtardyń jáne urys kólikteriniń sanyn kóbeitken jón dep esepteidi.
– Aqparattyq júieler men ozyq tehnologiiany engizý – mańyzdy mindet. Sheshim qabyldaý tiimdiligin arttyrýǵa jáne jaýyngerlik bólimshelerdiń áleýetin arttyrýǵa erekshe nazar aýdarý kerek. Bul áskerdi paidalaný tiimdiligin aitarlyqtai jaqsartady. Armiiamyzdy tolyqqandy qarýlandyrýda jáne jańǵyrtýda otandyq qorǵanys-ónerkásip kesheni mańyzdy ról atqarady. Úkimet áskeri ónimder men qyzmet túrlerin keńeitý úshin barlyq sharany qabyldaýǵa tiis. Taǵy bir ózekti másele – zaýyttardyń jáne áskeri bólimderdiń tehnikany jóndeý múmkindigin arttyrý. Bizdiń bul saladaǵy áleýetimiz joǵary, – dedi Memleket basshysy.
Prezident jaýyngerlik daiyndyq júiesin jetildirýdi kelesi bir másele retinde atap ótti. Sondai-aq mańyzdy halyqaralyq tájiribeni jan-jaqty zerttep, ozyq úlgilerin belsendi túrde qoldanýymyz kerek ekenin aitty.
– Qazirgi zamanda ábden mashyqtanǵan sarbazdar ǵana tiimdi urys júrgize alady. Sondai-aq sardarlardyń biliktiligi airyqsha ról atqarady. Ásirese, orta jáne tómengi býyndaǵy basshylardyń kásibi daiyndyǵy joǵary bolýy shart. Olardyń derbes sheshim qabyldaý qabileti jáne bastamashyldyq qasieti óte mańyzdy. Ásker basshylary qabyldaǵan sheshimine jaýap berýden qoryqpaýǵa tiis, – dedi Joǵarǵy Bas qolbasshy.
Jiynda áskeri bilim jáne ǵylym júiesin damytý máselesine de basa mán berildi.
– Áskeri akademiialar, institýttar álemdik standarttarǵa sai bolýǵa tiis. Osy saladaǵy joǵary oqý oryndarynyń materialdyq bazasyn nyǵaitý kerek. Sondai-aq oqý baǵdarlamasyn zaman talabyna sai beiimdeý qajet. Áskeri mamandar daiarlaý úshin basqa da joǵary oqý oryndarynyń múmkindigin keńinen paidalanǵan jón. Rektorlar stýdentterdiń jaýyngerlik daiyndyǵyna tikelei jaýapty bolýǵa tiis. Áskeri qaýipsizdik máselesi ǵylymi tujyrymǵa súienýi kerek. Iaǵni, ǵylymi-zertteý jumysyna basymdyq berý qajet. Áskeri oqý oryndary qorǵanys salasyndaǵy kásiporyndarmen tyǵyz bailanys ornatýy kerek, – dedi Qasym-Jomart Toqaev.
Memleket basshysy áskeri qyzmettiń bedelin jáne jaýynger mártebesin arttyrý qajettigine toqtalyp, áskeri qyzmetshilerdiń áleýmettik turǵydan qamtylý máselesine erekshe nazar aýdardy.
– El tynyshtyǵyn qorǵaityn árbir jas maman óz qyzmetin maqtan etýi kerek. Áskeri qyzmette bolý úlken abyroi sanalýǵa tiis. Biz buǵan qajetti barlyq jaǵdaidy jasaimyz. Qazir osy baǵytta naqty jumys jasalyp jatyr. Áskeri boryshyn ótep kelgen azamattar endi joǵary oqý ornyna jeńildikpen túsedi. Merzimdi áskeri qyzmettegi sarbazdar nesiesin tóleý mindetinen ýaqytsha bosatylady. Sondai-aq olar ózderi qalasa, armiia qatarynan naqty mamandyq alyp shyǵady. Jalpy, sarbazdardy áleýmettik qoldaý sharalaryn meilinshe kóbeitý qajet. Áskerde júrgen jastarymyz naǵyz sarbaz, naǵyz maman bolyp shyǵýy – mindet. Olar óskeleń urpaqqa úlgi-ónege bolýǵa tiis. Áskeri qyzmetshilerge jaqsy jalaqy tólenýi kerek. Úkimet kúshtik qurylymdarǵa eńbekaqy tóleýdiń biryńǵai júiesine kóshken kezde osyny eskerýge tiis, – dedi Prezident.
Budan keiin Memleket basshysy erligi men janqiiarlyǵy, eldiń ulttyq qaýipsizdigi men qorǵanys qabiletin qamtamasyz etýge, zańdylyq pen quqyq tártibin nyǵaitýǵa qosqan úlesi úshin birqatar áskeri qyzmetshini marapattady.
Atap aitqanda, III dárejeli «Aibyn» ordenimen Ulttyq qaýipsizdik komiteti Shekara qyzmeti Túrkistan oblysy boiynsha departamentiniń aǵa nusqaýshysy Babaqulov Qýanysh Isabekuly marapattaldy. «Erligi úshin» medali Qazaqstan Respýblikasy Ulttyq ulanynyń 6654 áskeri bóliminiń vzvod komandiri Lisbaev Baiseiit Jánibekuly men Tótenshe jaǵdailar ministrligi Batys Qazaqstan oblysy Tótenshe jaǵdailar departamenti órt sóndirý jáne avariialyq-qutqarý jumystary qyzmeti №1 mamandandyrylǵan órt sóndirý bóliminiń bólimshe komandiri Rahmataliev Daniiar Tilekbaiulyna tabystaldy. «Jaýyngerlik erligi úshin» medaline Qorǵanys ministrliginiń 19033 áskeri bólimi minasyzdandyrý bólimshesiniń komandiri Aldabergenev Meiir Salqynbekuly jáne Memlekettik kúzet qyzmetiniń jedel ýákili Ramazan Dáýren Qairatuly ie boldy.
Sonymen qatar jiynda Qorǵanys ministri Rýslan Jaqsylyqov, Memlekettik kúzet qyzmeti bastyǵynyń orynbasary – Aiyryqsha maqsattaǵy kúshterdiń qolbasshysy Aitqurman Omarbekov, Ulttyq qaýipsizdik komiteti tóraǵasynyń orynbasary – Shekara qyzmetiniń direktory Erlan Aldajumanov, Ishki ister ministriniń orynbasary – Ulttyq ulannyń Bas qolbasshysy Erkin Botaqanov, Qarýly Kúshterdiń ardageri Serikbai Ońbaev, áskeri qyzmetshi Ádi Talasbaev sóz sóiledi.
