Foto: Akorda.kz
Memleket basshysy Qyzylorda qalasynda jaqynda boi kótergen «Anaǵa taǵzym» ortalyǵyn aralap kórdi, dep habarlaidy "Ult aqparat" Aqordanyń baspasóz qyzmetine silteme jasap.
Atalǵan ortalyq biyl demeýshilerdiń qoldaýymen salynǵan. Jalpy quny – 1 milliard 700 million teńge.
Jobanyń maqsaty – ulttyq qundylyqtardy urpaqqa miras etip qaldyrý, dástúrli mádenietti jańǵyrtý, áielder eńbegin dáripteý. Sonymen qatar qyz-kelinshekter men analardy ómirge, turmysqa beiimdeý jumysymen de ainalysady.
Prezident ortalyqta qolóner sheberleri jasaǵan buiymdar kórmesin jáne «Qazaq eliniń uly analary» kartinasyn tamashalady. Sodan keiin «Anaǵa taǵzym» ortalyǵyndaǵy «Ult jaquty» mýzei zalymen, «Miras» ájeler klýbymen, «Jas otaý» mektebimen, «Shamshyraq» foto-video stýdiiasymen, psiholog-mediator kabinetimen tanysty.
Memleket basshysy mundai ortalyq jastarǵa tálim-tárbie berýde mańyzdy ról atqaratynyn aitty.
– Rasynda, bul jumys óte mańyzdy. Jastarymyzdyń arasynda ulttyq salt-dástúrimizdi, bolmysymyzdy, tilimizdi, dilimizdi nasihattaýymyz kerek. Áitpese, dúniejúzinde bolyp jatqan teris úrdisterdi bárimiz kórip otyrmyz. Ondai jaǵymsyz úrdister elimizde de bar. Biz olarmen kúresip, ózimizdiń ulttyq kózqarasymyzdy dáripteýimiz qajet, – dedi Qasym-Jomart Toqaev.
