Memleket basshysy ataqty tennisshilerdi «Aqorda» rezidentsiiasynda qabyldap, Rafael Nadal men Novak Djokovichke Qazaqstanǵa kelgenderi jáne qaiyrymdylyq matchyna qatysatyndary úshin rizashylyǵyn bildirdi.
– Bul – qazirgi zamannyń dańqty tennisshileriniń oiynyn Qazaqstanda kórýge keremet múmkindik. Atalǵan matchtyń qaiyrymdylyq maqsatta ótip otyrǵany asa mańyzdy. Sizderdiń astanamyzǵa kelgenderińiz Qazaqstanda damyp kele jatqan tenniske úlken qoldaý ekeni daýsyz. Búgingi balalarǵa kórsetetin sheberlik sabaqtaryńyz olarǵa jaqsy úlgi bolady jáne shabyttandyrady dep senemin, – dedi Qasym-Jomart Toqaev.
Qazaqstandaǵy tennistiń damýyna joǵary baǵa bergen Rafael Nadal men Novak Djokovich Prezidentke kezdesýge múmkindik jasaǵany jáne tenniske kórsetip otyrǵan qoldaýy úshin alǵystaryn aitty.
– Bul - meniń Qazaqstanǵa úshinshi ret kelýim. Ár kelgen saiyn ásem Elordanyń kelbetinen rahat tabamyn. Degenmen bul jolǵy saparym erekshe. Óitkeni ǵajap «Aqorda» saraiynda Ózińizben kezdesýge múmkindik aldym, – dep atap ótti Rafael Nadal.
– Prezident myrza, Qazaqstanda tenniske kórsetken qoldaýyńyz úshin alǵysymdy bildirgim keledi. Biz elderińizde tennistiń nasihattalýyna jáne damýyna óz úlesimizdi qosatynymyzǵa qýanyshtymyz, – dedi Novak Djokovich.
Qasym-Jomart Toqaev sportshylarǵa tabys tilep, Rafael Nadaldi shańyraq kóterýimen quttyqtady.
