Memleket basshysy Qazaqstanǵa jumys saparymen kelgen AQSh-tyń Aýǵanstandaǵy tatýlastyrý jónindegi arnaýly ókili Zalmai Halilzadty qabyldady, dep habarlaidy "Ult aqparat" Aqordanyń resmi saityna silteme jasap.
Kezdesý barysynda Aýǵanstandaǵy qaýipsizdik pen turaqtylyqty qamtamasyz etý boiynsha Qazaqstan men Amerika arasyndaǵy keńeitilgen strategiialyq seriktestikti damytýdyń perspektivalary, sonyń ishinde, AQSh pen NATO áskerleriniń osy elden shyǵarylý barysy qarastyryldy. Sonymen qatar Aýǵanstan memleketiniń turaqtylyǵy men áleýmettik-ekonomikalyq damýyn qaita qalpyna keltirý jónindegi ekijaqty jáne kópjaqty is-qimyldardy úilestirý máselesi de sóz boldy.
Qazaqstan Prezidenti amerikalyq diplomatqa iltipat bildirip, onyń bul saparynyń elderimiz arasyndaǵy joǵary deńgeidegi dialogty saqtaý turǵysynan mańyzy zor ekenine toqtaldy.
– Biyl biz Táýelsizdigimizdiń 30 jyldyǵyn atap ótemiz. Osy ýaqyt aralyǵynda biz dostyqqa jáne ózara tiimdi yntymaqtastyqqa negizdelgen qatynastardy ornata aldyq. AQSh – Qazaqstanyń senimdi seriktesi. Bizdiń ártúrli baǵyttar boiynsha, sonyń ishinde, saýda jáne ekonomika salalaryndaǵy belsendi yqpaldastyǵymyz jolǵa qoiylǵan, – dedi Qasym-Jomart Toqaev.
Memleket basshysy Aýǵanstandaǵy ahýaldy retteý jónindegi yntymaqtastyqty Qazaqstan men AQSh arasyndaǵy ózara yqpaldastyqtyń mańyzdy bóligi retinde atap ótti.
Prezident Aýǵanstannyń, Reseidiń, Qytaidyń, Ortalyq Aziia memleketteriniń jáne halyqaralyq uiymdardyń basshylarymen júrgizgen kelissózderinde aýǵan problemasy únemi nazarda bolatynyn jetkizdi.
Óz kezeginde Zalmai Halilzad Qasym-Jomart Toqaevqa jeke kezdesýge múmkindik bergeni úshin alǵys bildirdi. AQSh-tyń arnaýly ókili Qazaqstan Prezidentiniń Aýǵanstandaǵy turaqtylyqty qalpyna keltirýge baǵyttalǵan halyqaralyq is-qimyldarǵa qosqan úlesin joǵary baǵalap, elimizdiń Ortalyq Aziia óńirindegi turaqtylyqty saqtaýdaǵy mańyzdy róline toqtaldy.
Áńgimelesý barysynda Zalmai Halilzad Aýǵanstandaǵy qazirgi ahýalǵa baǵa berip, aýǵanaralyq beibit protsesti odan ári damytýǵa, aýǵan baǵytyndaǵy barlyq múddeli taraptardyń kúsh-jigerin úilestirýge qatysty AQSh diplomatiiasynyń oi-pikirin ortaǵa saldy.
