Prezident Qasym-Jomart Toqaev Úkimettiń keńeitilgen otyrysynda Mańǵystaý oblysyndaǵy munai-servis kompaniiasy jumysshylarynyń máselesine basa nazar aýdardy, dep habarlaidy Sputnik Qazaqstan.
Memleket basshysy Mańǵystaý oblysynyń ákimi Serikbai Turymovtan osy óńirdegi mańyzdy máseleler jaiynda surady. Sonyń biri – jumysshylardyń jalaqysy.
"Taǵy bir másele bar. Oblystyń munai jáne munai servisi kásiporyndaryndaǵy ahýal áli de kúrdeli. Munyń sebebi nede? Ákimdik tarapynan qandai sharalar qabyldanyp jatyr?", - dep surady Toqaev.
Oblys basshysy munai salasyndaǵy qiyndyqqa pandemiia sebep boldy dep otyr. Byltyr shikizattyń baǵasy kúrt tómendegen. Artynan munai salasynda qyzmet kórsetetin kompaniialardyń jumysy azaiǵan.
"Sodan másele týyndady. Qazir biz "QazMunaiGaz" kompaniiasymen birlesip, osy máseleni sheshý úshin keshendi josparymyzdy daiyndap jatyrmyz. Ondaǵy maqsat – servistik kompaniialar men munaishylardyń eńbekaqysyn teńestirý. Sebebi olar bir jumysty atqarady. Biraq jekemenshik servistik kompaniialardyń tarifi tómen. Al "QazMunaiGazǵa" qarasty mekemelerdiń tarifi odan joǵary. Sondyqtan olardyń jalaqysyn bir jobaǵa keltirip, osy máseleni úkimettiń aldynda kóteremiz. Negizgi másele, sol – eńbekaqy", - dep túsindirdi Turymov.
Al Prezident Mańǵystaý oblysynda sheshimin tappaǵan máselelerdiń az emes ekenin erekshe atap ótti.
"Jalpy, bul aimaqta sheshimin tappaǵan máseleler az emes. Bul - belgili nárse. Degenmen Mańǵystaý oblysynyń áleýeti zor. Kólik logistikasy, týrizm, arnaiy ekonomikalyq aimaq bar. Jýyq arada Úkimetpen, "QazMunaiGaz" kompaniiasymen jáne basqa organdarmen birlesip, Mańǵystaý oblysyn damytý jaiy men óńirdegi túitkildi máseleler jóninde arnaiy keńes ótkizemiz", - deidi Toqaev.
Aita keteiik, aqpan aiynda Jańaózen munaishylary kóshege shyqqan bolatyn. Atap aitqanda, "MunaiSpetsSnab Kompani" JShS jumysshylary jalaqyny kóterýdi jáne jumys tártibin retteýdi talap etken. Al shildeniń basynda qalada jumys isteitin "KEZBI" munai-servistik kompaniiasynyń 600 jumysshysy kóterildi. Olar da jalaqyny kóterýdi jáne jumys tártibin retteýdi talap etti.
