Qazaqstan Prezidentine biylǵy 9 ai ishindegi Qyzylorda oblysynyń áleýmettik-ekonomikalyq damýynyń negizgi kórsetkishteri týraly esep berildi, dep habarlaidy Aqordanyń baspasóz qyzmeti.
Gúlshara Ábdiqalyqova Qasym-Jomart Toqaevqa Qyzylorda oblysynyń 2023 jylǵa deiingi ekonomikalyq damý josparynyń ázirlenýi týraly málimet berdi. Onda ekonomikanyń túrli salalary boiynsha quny 271 milliard teńge bolatyn 265 jobany júzege asyrý jáne 4610 turaqty jumys ornyn ashý qarastyrylýda. Oblys ákiminiń aitýynsha, biyl jalpy quny 26 milliard teńge bolatyn 110 joba iske asyryla bastaǵan. Bul bastamalar aiasynda 2000 jumys orny ashylady.
Qazaqstan Prezidentine 15,5 myń gektar jerge egilgen dándi jáne maily daqyldardy jinaý naýqanynyń aiaqtalǵany jóninde aqparat berildi. 551,3 myń tonna kúrish jinalyp, jaqsy kórsetkishke qol jetkizilgen.
Oblys ákimi Memleket basshysyna Jumyspen qamtýdyń jol kartasynyń iske asyrylý barysy týraly aitty. Bul baǵdarlama aiasynda infraqurylymdyq jobalardy júzege asyrý úshin 38 milliard teńge tartylyp, 9 myńnan astam jumys orny ashylǵan.
Sonymen qatar Qasym-Jomart Toqaevqa oblystaǵy koronavirýspen kúreske qarsy qabyldanǵan sharalar týraly baiandaldy. Óńir ákiminiń aitýynsha, qazirgi tańda barlyq meditsinalyq uiymdar shtattyq rejimde jumys istep jatyr. Qajet bolǵan jaǵdaida 21 juqpaly aýrýlar statsionarynda qosymsha 3200-ge deiin tósek oryn daiyndaýǵa múmkindik bar. Aimaq qajetti dári-dármektermen jáne qorǵanysh quraldarymen tolyq qamtamasyz etilgen. Gúlshara Ábdiqalyqova Prezidentke 200 oryndyq modýldi juqpaly aýrýlar aýrýhanasynyń qurylysy bastalǵanyn jetkizdi. Nysan osy jyldyń 1 jeltoqsanyna deiin iske qosylady dep josparlanyp otyr.
Kezdesý sońynda Memleket basshysy Qyzylorda oblysynyń ákimine qaita óńdeý ónerkásibindegi ósim kórsetkishin jaqsartý, shaǵyn jáne orta bizneske qoldaý kórsetý, ekonomikalyq jobalardy ártaraptandyrý qajettigine qatysty birqatar tapsyrma berdi. Sondai-aq Prezident óńirdegi epidemiologiialyq ahýaldy qatań baqylaýda ustaýdy tapsyrdy.
