Qazaqstan Prezidenti Qasym-Jomart Toqaev búgingi jetistikterine Máskeý memlekettik halyqaralyq qatynastar institýtynda (MMHQI) alǵan biliminiń arqasynda qol jetkizgenin málimdedi.
Birinshi arnanyń efirinen aty ańyzǵa ainalǵan ýniversitettiń tarihyna arnalǵan "MMHQI álemniń barlyq tilinde" baǵdarlamasy kórsetildi. Film avtorlary ýniversitettiń tanymal túlekterimen, onyń ishinde Qazaqstan basshysy Toqaevpen kezdesti.
Qazaqstan Prezidenti MMHQI-de bilim alýy onyń ómirinde qandai ról atqarǵanyn aitty.
"MMHQI-de oqymaǵanymda bulai karera jasai almas edim dep oilaimyn. Ásirese BUU Bas hatshysynyń orynbasary retinde jumys istegenimdi aitatyn bolsam. Sondyqtan MMHQI halyqaralyq brend desek, asyra aitqandyq emes", - dep atap ótti Toqaev.
Bolashaq prezident Qasym-Jomart Toqaev onynshy synypta oqyp júrgeninde-aq tek qana MMHQI-ǵa túsemin dep sheshim qabyldaǵan. Ol rektorǵa hat jazyp, institýtqa qabyldaý erejeleri týraly surapty.
"Qatty tańqaldym, óitkeni mundai hattarǵa jaýap beretinin bilmedim, biraq soǵan qaramastan jaýap aldym. Áiteýir, olar meniń qujattarymdy qabyldady, 4 shildede alǵashqy, 11 shildede sońǵy emtihandy tapsyrdym, 12-13 shildede meni Máskeý mańyna kartopqa jiberdi", - dep eske aldy Qasym-Jomart Toqaev.
Esterińizge sala keteiik, 2019 jyly Resei Federatsiiasy syrtqy ister ministrliginiń Máskeý memlekettik halyqaralyq qatynastar institýty 75 jyldyq mereitoiyn atap ótedi.
Búgingi tańda institýt 18 baǵyt boiynsha mamandar daiyndaidy, onda 16 ǵylymi ortalyq jumys isteidi jáne 53 til oqytylady.
