Túrkistan oblysynda toi ústinde aitqan sózderi qoǵamda qyzý talqyǵa túsken 66 jastaǵy er adam ýaqytsha ustaý izoliatoryna qamaldy, dep habarlaidy ult.kz.
Buǵan deiin áleýmettik jelide onyń «mýzyka – haram, ánshiler – shaitannyń azanshysy» degen mazmundaǵy málimdemesi keńinen tarap, qoǵamda túrli pikir týǵyzǵan bolatyn. Osy oqiǵaǵa bailanysty politsiia qylmystyq is qozǵaǵan.
Quqyq qorǵaý organdarynyń málimetinshe, kúdikti ustalyp, tergeý amaldary júrgizilip jatyr.
Politsiia Qazaqstan Respýblikasy Konstitýtsiiasynyń birqatar normalaryna nazar aýdardy. Atap aitqanda, Konstitýtsiianyń 1-babyna sáikes, Qazaqstan – zaiyrly, quqyqtyq jáne áleýmettik memleket, al adam, onyń quqyqtary men bostandyqtary eń joǵary qundylyq bolyp sanalady.
Sondai-aq Konstitýtsiiada zań men sot aldynda jurttyń bári teń ekeni, jynysyna, ultyna, dinge kózqarasyna jáne ózge de mán-jailarǵa bailanysty kez kelgen kemsitýge jol berilmeitini kórsetilgen.
Budan bólek, sóz bostandyǵy basqa adamdardyń ar-namysy men qadir-qasietin buzbaýǵa tiis ekeni, al dini, ulttyq jáne áleýmettik arazdyqty qozdyrýǵa zańmen tyiym salynatyny eskertildi.
