Qazaqstanda Respýblikalyq pedagogtar keńesi qurylady. Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Bilim berý salasyndaǵy negizgi problemalardyń biri bul - barlyq múddeli taraptyń pikirin eskeretin keri bailanystyń jetispeýshiligi. Respýblikalyq pedagogtar keńesin qurýdy tapsyramyn. Oǵan árbir óńir óz ókilin taǵaiyndaidy. Pedagogikalyq keńes búkil pedagogikalyq qoǵamdastyqtyń únine ainalýy tiis. Bilim berý salasynda qabyldanatyn barlyq sheshimder eń aldymen osy keńeste talqylanýy kerek. Sonymen qatar bilim berý máselesine qatysty barlyq normativtik qujattarǵa saraptama júrgizýdi tapsyramyn», - dedi Eraly Toǵjanov pedagogtar men bilim jáne ǵylym salasy qyzmetkerleriniń respýblikalyq tamyz keńesi barysynda.
Premer-Ministr orynbasarynyń aitýynsha, tárbie berý jumystary da belgili bir júielilikti talap etedi. Oqytý protsesi ata-analardy tartý arqyly tálim-tárbie berýmen júrgizilýi tiis. Balalardy úiirmelermen, sektsiialarmen, qosymsha bilimmen qamtý da ózekti mindet bolyp otyr.
«Balalardyń tek 30,7 paiyzy ǵana qosymsha bilimmen qamtylǵan. Buǵan qosa, IýNISEF-tiń balalardyń jaǵdaiyna qatysty saraptamasynda óńirler arasyndaǵy teńsizdik deńgeiine bailanysty tabysy kúnkóris deńgeiinen tómen otbasydan shyqqan balalardyń qosymsha bilimge qoly jetpeitindigi atalyp ótilgen. Bul máseleni Qazaqstannyń Bala quqyqtary jónindegi ýákile de kóterip júr. Qosymsha bilim berýde jan basyna qarjylandyrýdy zańnamalyq turǵyda bekitýdi qamtamasyz etýdi jáne naqty tetikter ázirleýdi tapsyramyn»,- dedi Eraly Toǵjanov.
