Turaqty memlekettiń damýy úshin mindetti túrde qoǵamdyq kelisim bolýy kerek. Bul pikirdi Premer-Ministrdiń orynbasary Eraly Toǵjanov elordada Prezidenttik jastar kadrlyq rezerviniń forýmynda aitty, dep habarlaidy QazAqparat.
«Adami kapital týraly másele kún tártibinde tur jáne ol búgin ǵana paida bolǵan suraq emes. Memlekettik qyzmette júrgenimizge biraz ýaqyt boldy. Ideialardy aitý ońai, biraq júzege asyrý – bólek áńgime. Derekter boiynsha, búgingi rezervshilerdiń 90 paiyzy – memlekettik qyzmette eken. 13 myń adamnyń ishinen 300 adamdy iriktedi, onyń ishinde 180 adam jumysqa qabyldandy. Ashyǵyn aitqanda, munda myqtylardyń arasynan ozyp shyqqan myqtylar otyr deýge bolady. Bul – sizderge júktelgen úlken senim», - dedi Toǵjanov EKSPO kesheninde ótken forýmda.
Óz sózinde spiker Elbasy Nursultan Nazarbaev pen Memleket basshysy Qasym-Jomart Toqaevtyń el bolashaǵyna baǵyttalǵan sharalardy kóptep qolǵa alǵanyn, óz mamandyǵyn tereń meńgergen azamattyń ǵana básekege qabiletti bolatynyn atap ótti.
«Sońǵy jyldary tutas dúniejúziniń eń úlken máselesi – koronavirýs pandemiiasy boldy. Bizdiń elimizde de óte qiyn jaǵdai boldy, 400 myńǵa jýyq adam aýyryp, 4 myń adamnan aiyrylyp qaldyq. Sonyń bárinen sabaq alý kerek, 2008 jyly úlken dúniejúzildik daǵdarys bolǵanda, Elbasy árbir daǵdarysty memlekettiń damý múmkindigi dep qarastyrý qajetin aitqan edi. Pandemiia da – úlken daǵdarys, kózge kórinbeitin virýstan bir-aq kúnde milliondaǵan halqy bar qalalar turalap qaldy. Aita ketsem, túrli halyqtardyń basyn biriktirgen uiymda 9 jyldai jumys istegenmin. Kózge kórinbeitin, qolǵa ustalmaityn etnika, din máseleleri de el úshin óte mańyzdy. Mundai máseleler burq ete qalsa, kez kelgen memlekettiń bolashaǵyna qater tóndiredi. Turaqty memlekettiń damýy úshin mindetti túrde qoǵamdyq kelisim bolýy kerek. Sondyqtan kózge kórinbeitin dúnielerdi júrekpen sezinip, bolashaqta eskerýimiz kerek», - dep keńes berdi Premer-Ministr orynbasary.
E. Toǵjanov memlekettiń damýy úshin eń aldymen deni saý ult pen sanaly qoǵa qajet ekenin aitty.
«Dala filosofiiasy deimiz ǵoi, qazaqtar baiaǵyda-aq «Birinshi bailyq – densaýlyq» dep aityp ketken. Densaýlyǵy myqty ult qana dami alatynyn barsha álem túsindi dep oilaimyn. Ekinshiden – sanaly qoǵam bolashaqta aýqymdy dami alady. Bizde ártúrli jobalar boldy. Sanaly qoǵam qalyptasqan jerde – bilimdi ult ta, básekege qabiletti ult ta, tártipke negizlgen, salt pen dástúrdi tereń qabyldaityn qoǵam bolady, mundai qoǵamda qiyn máselelerdi eńserýge bolady. Mysaly Japoniia, Singapýr, 1 mlrd 400 mln halqy bar Qytaidy mysal etýge bolady. Bizdiń elimizde osyndai qoǵam qalyptasty dep aitýǵa áli erte. Sanaly qoǵamda el toqta degende toqtaidy, saqtyq sharalaryn saqtaidy. Qiyn epidemiologiialyq jaǵdaida da, qansha adam ómirden ótip jatqanda da virýsqa senbeitinderdi kórgen shyǵarsyzdar. Biraq jeme-jemge kelgende daý-damai shyǵyp jatady, biraq onyń bári kesh bolady. Bul – bizdiń kúnde ainalysyp jatqan suraqtarymyz, osyny eskerýimiz kerek», - deidi Eraly Toǵjanov.
Sóz sońynda spiker pandemiianyń Qazaqstandaǵy qoǵamǵa qalai yqpal etkenin aitty.
«Ár qiyndyqtyń bir artyqshylyǵy bolady. Pandemiia arqyly sana-sezimimizde tóńkeris boldy. Talai dúnieniń tezirek damýyna yqpal etti, máselelerdi qysqa merzimde sheshý qajet boldy. Mysaly pandemiia bolmaǵanda, kompiýtermen qamtamasyz etý máseleleri taǵy 5 jylǵa sozylar ma edi. Óz elimizde kompiýter, noýtbýk qurastyratyn kompaniialar ashyldy. Qoǵam dáriger men ustazdardyń qadirin túsindi. Óz balalaryn oqytyp sharshaǵan ata-analar bar. Qazir jaǵdai qalyptasyp kele jatyr. «Ashyq» jobasy ashylyp, aýrý qarqynyn baqylaý kúsheidi. Buryn ýaqyt jumsap, jinalystarda bas qosyp júrsek, qazir alys jerlerden, aýdandardan kelmei-aq, onlain rejimde sóilesetin múmkindik týdy», - dedi Eraly Toǵjanov.
