Búgin QR Premer-Ministriniń orynbasary Eraly Toǵjanov «Qazaqstan Aselsan Injiniring» JShS, «Bolashaq 2019» JShS jumysymen jáne Ulttyq ǵylymi onkologiialyq ortalyqtyń qurylys barysymen tanysty, dep habarlaidy primeminister.kz.
Jumys sapary «Qazaqstan Aselsan Injiniring» JShS-ny aralaýdan bastaldy, onda QR Úkimetiniń tapsyrysy boiynsha otandyq ÓJJ apparattary jasalýda.
Kásiporynda 31 tamyzǵa deiin 750 ÓJJ apparatyn, 20 qyrkúiekke deiin qosymsha 750 birlik ÓJJ apparatyn jasap shyǵarý josparlanǵan. Bul apparattar jergilikti meditsinalyq personaldy oqytýmen qosa, elimizdiń 297 aýrýhanasynda ornatylady.
Kepildi servistik qyzmet kórsetý 37 aiǵa deiin bolady. Sonymen qatar «Qazaqstan Aselsan injiniring» JShS bazasynda dene qyzýyn qashyqtan ólsheýge arnalǵan otandyq teplovizorlardy óndirý múmkindigi qarastyrylýda.
Sondai-aq Toǵjanov «Bolashaq 2019» JShS-de boldy, munda aiyna 2 mln-ǵa deiin maska shyǵaratyn óndiristik qýaty bar meditsinalyq maska óndirisi jolǵa qoiylǵan.
Vitse-premer óndiristik kásiporyndardyń jumysyna oń baǵa berip, úkimet otandyq óndirýshilerdi jan-jaqty qoldaitynyn atap ótti.
Buǵan qosa QR Premer-Ministriniń orynbasary Ulttyq ǵylymi onkologiialyq ortalyq qurylysy barysymen jáne onkologiia boiynsha jobalyq keńseniń jumysymen tanysty.
Bul ortalyq bolashaqta azamattarǵa qaterli isikterdi erte diagnostikalaý jáne emdeý boiynsha joǵary bilikti jáne joǵary tehnologiialyq meditsinalyq kómek kórsetýge múmkindik beredi.
Vitse-premer bul ortalyqtyń ulttyq deńgeide onkologiialyq kómek kórsetýdiń integratsiialanǵan modelin qurýda, alǵashqy meditsinalyq-sanitarlyq kómek, onyń ishinde barlyq óńirlik onkologiialyq ortalyqtar men alty joǵary tehnologiialyq radiatsiialyq onkologiialyq ortalyqtardy úilestirýshi bolatynyn atap ótti.
Sondai-aq kadrlardy, dárigerler men tehnikalyq personaldy (meditsinalyq tehnikter) daiarlaý mindeti qoiyldy.
