Pandemiia kezinde mobildi jasaqtar 750 myń ret úilerge baryp járdem kórsetken, dep habarlaidy QazAqparat.
Bul týraly Premer-Ministrdiń orynbasary Eraly Toǵjanov Elbasy kitaphanasynda ótken meditsina qyzmetkerlerimen kezdesýde aitty.
«Pandemiia kezinde meditsina qyzmetkerleri óz densaýlyǵyn qaterge tige júrip, virýspen kúrestiń aldyńǵy shebinde boldy. Bul jumystyń nátijesi – myńdaǵan qutqarylǵan ómir. Pandemiia kezinde 380 myńnan astam adam koronavirýs infektsiiasynan emdelip, jazylyp shyqty. Meditsina qyzmetkerleriniń kúsh-jigeriniń arqasynda eldegi epidemiologiialyq jaǵdaidy turaqtandyrýǵa múmkindik týdy. Qysqa merzim ishinde azamattarymyzdyń densaýlyǵyn saqtaýǵa baǵyttalǵan aitarlyqtai kúsh pen qarajat jumyldyryldy. Qysqa merzimde halyqaralyq standarttarǵa sai keletin 16 juqpaly aýrýlar aýrýhanasy salyndy», - dep atap ótti Vitse-Premer.
Úkimet basshysynyń orynbasary bul kezeńde óńirlerge 1200-den astam sanitarlyq avtokólik, 100 jyljymaly meditsinalyq keshen jiberilgenin atady.
«Qysyltaiań shaqta 3,6 myńnan astam mobildi brigadanyń jumysy jolǵa qoiyldy. Ótken jyly mobildi brigadalar 750 myńnan astam naýqastyń úiine baryp qyzmet kórsetti», - dedi Eraly Toǵjanov.
