پاندەمييا كەزٸندە موبيلدٸ جاساقتار 750 مىڭ رەت ٷيلەرگە بارىپ جەردەم كٶرسەتكەن, دەپ حابارلايدى قازاقپارات.
بۇل تۋرالى پرەمەر-مينيستردٸڭ ورىنباسارى ەرالى توعجانوۆ ەلباسى كٸتاپحاناسىندا ٶتكەن مەديتسينا قىزمەتكەرلەرٸمەن كەزدەسۋدە ايتتى.
«پاندەمييا كەزٸندە مەديتسينا قىزمەتكەرلەرٸ ٶز دەنساۋلىعىن قاتەرگە تٸگە جٷرٸپ, ۆيرۋسپەن كٷرەستٸڭ الدىڭعى شەبٸندە بولدى. بۇل جۇمىستىڭ نەتيجەسٸ – مىڭداعان قۇتقارىلعان ٶمٸر. پاندەمييا كەزٸندە 380 مىڭنان استام ادام كوروناۆيرۋس ينفەكتسيياسىنان ەمدەلٸپ, جازىلىپ شىقتى. مەديتسينا قىزمەتكەرلەرٸنٸڭ كٷش-جٸگەرٸنٸڭ ارقاسىندا ەلدەگٸ ەپيدەميولوگييالىق جاعدايدى تۇراقتاندىرۋعا مٷمكٸندٸك تۋدى. قىسقا مەرزٸم ٸشٸندە ازاماتتارىمىزدىڭ دەنساۋلىعىن ساقتاۋعا باعىتتالعان ايتارلىقتاي كٷش پەن قاراجات جۇمىلدىرىلدى. قىسقا مەرزٸمدە حالىقارالىق ستاندارتتارعا ساي كەلەتٸن 16 جۇقپالى اۋرۋلار اۋرۋحاناسى سالىندى», - دەپ اتاپ ٶتتٸ ۆيتسە-پرەمەر.
ٷكٸمەت باسشىسىنىڭ ورىنباسارى بۇل كەزەڭدە ٶڭٸرلەرگە 1200-دەن استام سانيتارلىق اۆتوكٶلٸك, 100 جىلجىمالى مەديتسينالىق كەشەن جٸبەرٸلگەنٸن اتادى.
«قىسىلتاياڭ شاقتا 3,6 مىڭنان استام موبيلدٸ بريگادانىڭ جۇمىسى جولعا قويىلدى. ٶتكەن جىلى موبيلدٸ بريگادالار 750 مىڭنان استام ناۋقاستىڭ ٷيٸنە بارىپ قىزمەت كٶرسەتتٸ», - دەدٸ ەرالى توعجانوۆ.
