QR Premer-Ministrdiń orynbasary Eraly Toǵjanov bastaǵan úkimettik delegatsiia Jambyl oblysynyń Qordai aýdanyna bardy, dep habarlaidy primeminister.kz.
Jumys sapary barysynda vitse-premer Gvardeiskii aýylyndaǵy biologiialyq qaýipsizdik problemalary ǵylymi-zertteý institýty janyndaǵy biofarmatsevtikalyq zaýyttyń qurylys barysymen tanysty.
Zaýyt áleýmettik mańyzy bar juqpaly aýrýlarǵa qarsy elge qajetti biopreparattar shyǵatyn bolady. Olardyń qatarynda COVID-19, pandemiialyq tumaý, maýsymdyq tumaýǵa qarsy split-vaktsinalar, týberkýlez, brýtsellez, nodýliarlyq dermatit, kúiis qaiyratyn usaq janýarlardyń obasy, qoi men eshkiniń kontagiozdy ektimasy, qoi sheshegi, qutyrýǵa qarsy vaktsinalar jáne basqa da preparattar bar.
Eraly Toǵjanov qurylystyń tehnologiialyq úderisi men óndiris jaǵdailarynyń odan ári GMP standarttaryna sáikestigin eskere otyryp, júrgizilýine nazar aýdarýdy tapsyrdy. Sondai-aq, vitse-premer merdiger kompaniialardyń ǵylymi-zertteý institýty, densaýlyq saqtaý, bilim jáne ǵylym ministrlikteriniń basshylyǵymen tyǵyz qarym-qatynasta jumys jasaý qajettigin atap ótti.
Qurylys alańynyń aýmaǵynda vitse-premer jobamen, zaýyt týraly negizgi óndiristik jáne tehnologiialyq málimettermen tanysty, óndiristik protsestiń maketi men shemasyn qarap shyqty. Montajdaý jumystaryn aiaqtaý jáne iske qosý naýryz aiyna josparlanyp otyr. Qosalqy ǵimarattar men qurylystardyń, naqtyraq aitsaq qazandyq, transformator jáne sorǵy stantsiialarynyń, hlorlaý, energetikalyq nysandardyń qurylysy aiaqtalǵan. Kún jylyǵanda irgesi abattandyrylyp jáne kógaldandyrylatyn bolady.
Budan soń Eraly Toǵjanov 1958 jyldan beri jumys istep kele jatqan biologiialyq qaýipsizdik máseleleri institýtyna arnaiy at basyn burdy. Onda 214 adam eńbek etedi. Ǵylymi mekemeniń basshysy, biologiia ǵylymdarynyń doktory Kúnsulý Zakariia institýttyń qyzmeti men jetistikteri, sondai-aq COVID-19 vaktsinasyn ázirleý boiynsha ǵylymi zertteýlerdiń nátijeleri týraly baiandady.
Sondai-aq, Vitse-premer ǴZI qyzmetkerleri úshin 60 páterli kóp qabatty úidiń qurylysymen tanysty. Búginde árleý jumystary, qasbeti pen shatyrdy jóndeý jumystary júrgizilýde. Úshinshi jailylyq klasyndaǵy páterlerdiń jalpy aýdany 3,6 myń sharshy metrdi quraidy. Syrtqy árleý, ishki bólimderdi ornatý jáne elektrmen jabdyqtaý jumystary qalyp otyr.
Jaqyn mańda taǵy eki turǵyn úi men dene shynyqtyrý-saýyqtyrý ǵimaratynyń qurylysy josparlanýda desek, sporttyq nysannyń ekinshi qabatynda 150 oryndyq akt zaly ornalaspaq.
Sonymen qatar, úkimettik delegatsiia Qordai aýdany Otar aýylyndaǵy sporttyq-saýyqtyrý kesheni men jańa avtomattandyrylǵan gaz taratý stantsiiasynda boldy.
