QR Premer-Ministriniń orynbasary Eraly Toǵjanov bastaǵan úkimettik delegatsiia Qordai aýdanyna bardy, dep habarlaidy "Ult aqparat" primeminister.kz-ke silteme jasap.
Jumys sapary barysynda vitse-premer Gvardeiskii aýylyndaǵy Biologiialyq qaýipsizdik problemalary ǵylymi-zertteý institýty janyndaǵy otandyq immýndyq preparattar shyǵaratyn zaýyttyń qurylysy barysymen tanysty. Zaýyt Memleket basshysy Qasym-Jomart Toqaevtyń tapsyrmasyna sáikes salynýda. Qurylys-montajdaý jumysy biyl aiaqtalady, qazirgi ýaqytta barlyq injenerlik kommýnikatsiia júrgizilgen. Jumysqa 145 adam jáne 30 tehnika jumyldyrylǵan. Zaýyt kelesi jyldyń birinshi toqsanynda jumys istei bastaidy.
Munda álemdik standarttarǵa sáikes immýnobiologiialyq preparattar, onyń ishinde koronavirýs infektsiiasyna, tumaýǵa, týberkýlezge, brýtsellezge, nodýliarlyq dermatitke basqa da infektsiialyq aýrýlarǵa qarsy vaktsina shyǵarylady. Jyl saiyn biopreparattardyń 30-60 mln dozasyn óndirý josparlanyp otyr.
Premer-Ministrdiń orynbasary institýt qyzmetkerlerimen kezdesip, olardy áńgimege tartty.
«Biofarmatsevtikalyq zaýyttyń qurylysy jáne koronavirýsqa qarsy otandyq vaktsina jasaý el Prezidentiniń erekshe baqylaýynda. Biz búgin barlyq kókeikesti máselelerdi osy jerde talqylap, sheshý úshin arnaiy kelip otyrmyz. Turǵyn úimen jáne materialdyq-tehnikalyq qamtamasyz etý, jalaqyny kóterý máseleleri qazirdiń ózinde sheshimin tabýda. Sonymen birge sizderge úlken jaýapkershilik júktelip otyr. Búkil el sizderge úmit artady», - dedi Toǵjanov.
Jambyl oblysynyń ákimi Berdibek Saparbaev iri zaýyttyń salynýy aimaq ekonomikasynyń damýyna jańa serpin beretinin atap ótti.
Budan soń Eraly Toǵjanov institýt qyzmetkerlerine arnalǵan 60 páterlik úidiń qurylysymen tanysty. Nysannyń qurylysy tamyz aiynda bastalǵan, ol kelesi jyldyń basynda paidalanýǵa beriledi. Taǵy eki turǵyn úidiń qurylysy josparlanyp otyr.
Institýt jumysymen tanysqan soń Eraly Toǵjanov Qordai aýdanynyń damýy, sondai-aq ǵylymi-zertteý institýtynyń ózekti máselelerin sheshý jóninde keńes ótkizdi.
