QR Premer-Ministriniń orynbasary Eraly Toǵjanov bastaǵan Úkimet delegatsiiasy jumys saparymen Atyraý oblysyna bardy, dep habarlaidy "Ult aqparat".
«Jumys sapary barysynda Eraly Toǵjanov óńirdegi epidemiologiialyq ahýal, «Teńiz» kenishindegi jumysshylardy shyǵarý men Jumyspen qamtýdyń jol kartasyn iske asyrý máselelerine qatysty keńes ótkizdi.
QR Premer-Ministriniń orynbasary Eraly Toǵjanov elimizde koronavirýs infektsiiasyn juqtyrý ósimi 2-3% deńgeiinde ekenin atap ótti. Kórsetkishtiń tómendeýi Memleket basshysy Qasym-Jomart Toqaevtyń tapsyrmasymen qabyldanǵan naqty sharalardyń nátijesi», delingen Prezident janyndaǵy TJ rejimin qamtamasyz etý jónindegi memlekettik komissiianyń Telegram paraqshasynda .
Atyraý oblysynyń ákimi Mahambet Dosmuhambetovtiń aitýynsha, aimaqtaǵy epidemiologiialyq jaǵdai áli de turaqty emes. Qazirgi kezde óńirde COVID-19 infektsiiasyn juqtyrǵan 458 adam tirkelgen. Olardyń 127-si emdelip shyqty. Al «Teńiz» kenishiniń 384 jumysshysynan atalǵan virýs anyqtalǵan. Bul azamattar 20 jataqhanada turatyn 33 mekemeniń qyzmetkerleri.
QR Densaýlyq saqtaý ministri Eljan Birtanovtyń aitýynsha, «Teńiz» kenishinde karantindik talaptar jetkilikti deńgeide saqtalmai otyr. Sondyqtan, ol «Teńizshevroil» kompaniiasynyń merdiger jáne sýbmerdiger kompaniialary basshylarynyń jaýapkershiligin arttyrýǵa shaqyrdy.
Qazirgi kezde «Teńiz» kenishinen 17 myń adam ózderiniń turǵylyqty jerine jetkizilgen.
Sondai-aq, keńes barysynda «Jumyspen qamtýdyń jol kartasy-2020» baǵdarlamasyn óńirde júzege asyrý barysy qaraldy. Úkimet biyl 1 mln 220 myń adamdy jumyspen qamtýdy josparlap otyr. Atyraý oblysynda bul baǵdarlama sheńberinde 63 joba júzege asyrylyp, 7 myń jumys orny ashylady. Oǵan respýblikalyq biýdjetten 35 mlrd 308 mln teńge bólinip otyr.
Otyrysty qorytyndylaǵan QR Premer-Ministriniń orynbasary Eraly Toǵjanov epidemiologiialyq ahýaldy baqylaýda ustaýdy tapsyryp, «Jumyspen qamtýdyń jol kartasy-2020» baǵdarlamasyn tiimdi júzege asyrý jáne jumyspen qamtamasyz etýge qatysty birqatar naqty tapsyrmalar berdi.
