Memleket basshysy Qasym-Jomart Toqaev kórnekti kinorejisser, jazýshy, Qazaqstannyń eńbek sińirgen qairatkeri, Memlekettik syilyqtyń iegeri Satybaldy Narymbetovtiń otbasy men jaqyn týystaryna kóńil aitty.
Bul týraly Prezidenttiń baspasóz hatshysy Berik Ýáli Facebook-tegi paraqshasynda jazdy.
– Satybaldy Jáleluly qazaq kinosynda ózindik qoltańbasy bar, sýretkerlik sheberligin udaiy shyńdap otyratyn daryndy rejisser edi. Qoǵamdaǵy kúrdeli ózgeristerdi, zamannyń jańarǵan kelbetin ekran arqyly kórsete bildi. Shyǵarmashylyq izdenister nátijesinde dúniege kelgen árbir týyndysy synshylar men kórermender tarapynan joǵary baǵasyn aldy. Sondai-aq ár jyldary jaryq kórgen kitaptaryn oqyrmandar jyly qabyldady. Otandyq kino ónerin jáne rýhani-mádeni salany damytýǵa mol úles qosyp, sońyna jarqyn iz, óshpes mura qaldyrǵan Satybaldy Jálelulynyń esimi men beinesi halqymyzdyń jadynda saqtalady. Marqumnyń jany jánnatta, imany salamat bolsyn, – dep jazylǵan Prezidenttiń jedelhatynda.
