QR Aqparat jáne kommýnikatsiialar ministri Dáýren Abaev kelesi jyly tirkelmegen telefondarǵa uialy bailanystyń qosylmaitynyn taǵy bir márte eske saldy, dep xabarlaidy QazAqparat tilshisi.
Ministrdiń aitýynsha, osydan eki jyl buryn uialy telefondady tirkeýdiń jańa erejeleri qabyldanǵan bolatyn. Sodan beri arnaiy aqparattyq júie ázirlendi. Ony iske asyrýdyń arqasynda uialy telefondardyń urlyǵyn aitarlyqtai azaitýǵa bolady. Sebebi ishki ister organdary urlanǵan telefondy IMEI-kod arqyly birden buǵattai alady.
«Degenmen, IMEI-kodtyń kómegimen telefon iesin anyqtaý qiyn bolyp tur. Al jańa normany tolyqqandy iske qosý úshin IMEI-kodty adamnyń jeke sáikestendirý nómirimen, sondai-aq, telefon nómirimen bailanystyrý qajet. Osylaisha, uialy bailanys paidalanýshylary 2018 jyldyń aiaǵyna deiin óz qurylǵylaryn tirkep qoiýy qajet. Sebebi 2019 jyly 1 qańtardan bastap tirkelmegen abonentterge qyzmet kórsetilmeidi», - dedi D.Abaev xalyqqa esep berýi kezdesýinde.
Ministrdiń sózine qaraǵanda, IMEI-kodtardyń bazasyn jasaqtaý kezinde Ulybritaniia, Túrkiia, Ázerbaijan siiaqty memleketterdiń tájiribesi eskerildi.
«Árine, uialy telefondardy tirkeýge qatysty xalyq arasynda dúrligý týyndaýy múmkin. Ony da jaqsy túsinemiz. Sol sebepti telefon tirkeýdiń onlain qyzmetin iske qosýdy josparlap otyrmyz», - dep atap kórsetti D.Abaev.
