Astanalyq belsendi Syrym Ábdirahmanovtyń ústinen tórt bap boiynsha qylmystyq is qozǵalǵan. Aryzdyń bireýin astanalyq sheneýnikterdiń biri túsirgen.
Astanalyq belsendi, tirkelmegen "Alash" halyqtyq sotsial-demokratiialyq partiiasynyń jetekshisi Syrym Ábdirahmanov eki aiǵa qamaldy. Bul jaily Azattyq tilshisine onyń advokaty Tólegen Shaikov habarlady.
Onyń aitýynsha, qazirgi kezde Astana politsiiasy tórt bap boiynsha partiia jetekshisiniń ústinen qylmystyq is qozǵaǵan. Aryzdyń bireýin astanalyq sheneýnikterdiń biri túsirgen.
- Tórt bap boiynsha tergeý júrip jatyr. Bular: 274-BAP, 1-bólim ("Kórineý jalǵan aqparat taratý"), 380-BAP, 3-bólim, 1-pýnkt ("Bilik ókiline qatysty kúsh qoldaný"), 407-BAP, 2-bólim ("Sotqa deiingi tergep-tekserý júrgizýge kedergi jasaý"), 378-BAP, 1-bólim, 1-pýnkt ("Bilik ókilin qorlaý"), - deidi Tólegen Shaikov Azattyq tilshisine.
Astana qalalyq tergeý soty Syrym Ábdirahmanovtyń eki aiǵa qamalǵanyn rastady. Sottyń baspasóz hatshysy Botagóz Baianovanyń aitýynsha, qorǵaý taraby appeliatsiiaǵa shaǵym túsirgen. Biraq sheshimniń qashan shyǵatyny belgisiz.
Áriptesteriniń aitýynsha, jaza taǵaiyndaý boiynsha sot otyrysy 1 jeltoqsanda Astana qalalyq tergeý sotynda ótken. Biraq oǵan advokaty men qoǵamdyq qorǵaýshysynan basqa eshkimdi qatystyrtpaǵan. Partiia hatshysy Ádilet Ǵabdýlla "sottyń esh múmkindik bermesten ony birden qamap tastaǵany túsiniksiz bolyp qaldy" deidi.
Astana qalalyq ishki ister departamentiniń baspasóz qyzmeti Ábdirahmanovqa qatysty "sotqa deiingi tergeý amaldary" júrip jatqanyn aityp, sál keiinirek aqparat taratatynyn aitty.
Ábdirahmanov qamalǵan soń internette prezident Nursultan Nazarbaevqa arnap jazylǵan hat paida boldy. Onda partiia ókilderi "jemqorlyq jaily ashyq aityp júrgen" Ábdirahmanovtyń sońǵy birneshe aida birneshe ret zańsyz qamalǵanyn aityp, qýǵynǵa ushyraǵanyn baiandaǵan. Hat avtorlary ony qýǵyndaýdy toqtatyp, bosatýdy talap etken.
Buǵan deiin jergilikti basylymdar Astana qalasy ákiminiń orynbasary Sergei Horoshýnnyń Syrym Ábdirahmanovtyń ústinen politsiiaǵa aryz túsirgenin habarlaǵan. Sheneýnik blogerdi ózine qatysty “jalǵan aqparat taratty” dep aiyptaǵan edi. Seisenbi kúni Astana qalalyq ákimdigine habarlasqanymyzben jaýap ala almadyq.
Qoǵamdyq pikir týǵyzatyn oqiǵalardyń ortasynda júretin Syrym Ábdirahmanov 2017 jyly "Alash" partiiasynyń qurylatynyn málimdep, kópke tanymal bola bastaǵan. Ol kezde kóp adam ony "biliktiń jasandy jobasy" dep synaǵan edi. Al Ábdirahmanov "Alash" qozǵalysy áldekimder aiyptaityndai "bilik tapsyrmasymen qurylatyn partiia emes, halyqtyń ishinen shyǵatyn partiia" dep aiyptaýlardy joqqa shyǵarǵan. Nur-Otan" partiiasynyń burynǵy múshesi 36 jastaǵy belsendi saiasatta "qajet bolsa, bilikpen de jumys istesý kerek" degen kózqaras ustanady. Partiia ókilderiniń aitýynsha, "Alash" partiiasy ázirge, elde resmi túrde tirkelmegen. Onyń shamamen bes myń jaqtaýshysy bar.
