Atyraý oblystyq patologoanatomiia biýrosynyń burynǵy direktory laýazymdyq ókilettigin asyra paidalanǵany jáne qyzmet babynda jalǵan qujat jasaǵany úshin sottaldy. Bul týraly onlain brifing barysynda QR Sybailas jemqorlyqqa qarsy is-qimyl agenttiginiń 1-shi departamentiniń aǵa tergeýshisi Daniiar Biǵaidarov aitty, dep habarlaidy "Ult aqparat".
Onyń atap ótýinshe, Atyraý oblystyq sybailas jemqorlyqqa qarsy qyzmeti «Atyraý oblystyq patologoanatomiialyq biýrosy» memlekettik kásiporyn direktorynyń mindetin atqarýshy I.Moldaǵalievqa qatysty qylmystyq quqyq buzýshylyq boiynsha sotqa deiingi tergeýdi aiaqtady.
«Ol sot-meditsinalyq saraptamanyń qorytyndysy boiynsha tiri týylǵan náresteni óli týǵan dep kórsetip, patologoanatomiialyq zertteýdiń hattamasyna kórineý jalǵan aqparat engizý arqyly laýazymdyq ókilettikterin asyra paidalanǵan degen kúdik boldy», - dedi ol.
Aǵa tergeýshiniń dereginshe, osy jyldyń 28 naýryzynda Atyraý qalasynyń №2 sotynyń úkimimen I.Moldaǵalievke 1 325 500 teńge kólemindegi aiyppul salyndy.
«Sottalýshy ómir boiyna memlekettik qyzmette laýazym atqarý quqyǵynan aiyryldy», - dedi Daniiar Biǵaidarov.
