Áleýmettik jelilerde Munaily aýdany Mańǵystaý selosynyń 1984 jyly týǵan turǵyny vaktsinadan qaza boldy degen jalǵan aqparat tarady, dep habarlaidy "Ult aqparat".
Feik aqparatty taratýshylar tiri adamnyń sýretin salyp qoiǵan. Bul týraly onyń áieli habarlady.
«Sýrettegi meniń joldasym Sýgýrbaev Bahytjan Chokyrbaevich 1984 jyly 1 qańtarda dúniege kelgen.
Áleýmettik jelide taraǵan aýdio jazbanyń artyna tirkep sýretti taratyp jibergen. Tiri adamdy qaitys boldy dep. Qaitys bolǵan basqa adam, biz ony tanymaimyz. Alla Bahytjannyń denine saýlyq, uzaq ómir bersin. Aqparattyń shyndyq ekenine kóz jetkizip baryp taratyńyzdar», - dedi ol.
Qazir mán-jai Mańǵystaý oblysynyń Politsiia departamentine habarlandy.
Aita keteiik, buǵan deiin Mańǵystaý turǵynynyń ekpeden qaitys bolǵany jaily aqparattyń jalǵan ekenin habarlaǵan bolatynbyz.
