Foto: Nadejda Strelets / YouTube
Reseilik telejúrgizýshi Tina Kandelaki Qyrǵyzstandy "rýsofobiia" bar dep aiyptady, -dep habarlaidy "Ult Aqparat".
Tina Kandelaki Qyrǵyzstan astanasy Bishkektegi Panfilov diviziiasynyń murajaiy ǵimaratynyń buzylýyna qatysty pikir bildirdi. Onyń aitýynsha, ǵimaratty qalpyna keltirý múmkindigi bolǵan, biraq Qyrǵyzstan biligi bul múmkindikti paidalanbaǵan. Sondai-aq, Kandelaki Qyrǵyzstanda "rýsofobiianyń" burynnan qalyptasqanyn málimdedi.
"Batys stsenariishileri Máskeý úshin janyn qiǵan diviziia týraly estelik Qyrǵyzstanda bolmaýy kerek dep esepteidi. Eldegi rýsofobiianyń negizi burynnan qalyptasqan... Biz muny Ýkrainadan, Qazaqstannan jáne Armeniiadan baiqadyq, al qazir Qyrǵyzstanda kórinis tapty", – dep jazdy Kandelaki.
Kandelakidiń pikirinshe Qyrǵyzstan biliginde Batystyń usynysymen Sovet Úkimeti tarihtyn óshirip jatqan kórinedi.
"Bizdiń ortaq ótkenimizdi alyp tastap, orystarǵa degen óshpendilikpen almastyratyn basqarylatyn saiasatkerler toby kópten beri otyr. Al bári - eski murajaidan bastaldy", - deidi Tina Kandelaki.
Ótken aptada Qyrǵyz biligi Ivan Panfilov atyndaǵy Áskeri dańq murajaiy ornalasqan ǵimarattyń respýblikalyq mańyzy bar tarih jáne mádeniet eskertkishteriniń tiziminen shyǵarylatynyn habarlady. Osyǵan bailanysty, bilik ǵimaratty buzyp, onyń ornyna jer silkinisine tózimdi zamanaýi ǵimarat salýdy usyndy.
Telejúrgizýshiniń sózine Qyrǵyzstan prezidenti ákimshiliginiń aqparattyq saiasat bóliminiń meńgerýshisi Daiyrbek Orynbekov jaýap berdi.
"Qujatta ǵimarattyń seismikalyq normalarǵa sáikes kelmeitini kórsetilgen. Ǵimaratty odan ári paidalaný adamdardyń ómirine qaýip tóndiredi. Ony qalpyna keltirý múmkin emes", – dep jazdy Daiyrbek Orynbekov áleýmettik jelide.
Daiyrbek Orynbekov Tina Kandelaki tarihty oqysa pikiri 180 gradýsqa ózgeretinin aitty.
Aita keteiik, telejúrgizýshiniń Orta Aziia elderin aiyptaýy alǵash emes, ol biyl aqpan aiynda Qazaqstandy "orys tilin yǵystyryp otyr" dep aitypaǵan. Bul qoǵamda rezonans týdyryp, Qazaqstan syrtqy ister ministrliginiń resmi ókili Aibek Smadiiarov: "Kandelaki Qazaqstanǵa kele qoimas, kelse de kire almaidy" degendi aitqan edi.
