Qazaqstan shahmat federatsiiasynyń prezidenti Timýr Týrlov Halyqaralyq shahmat federatsiiasy (FIDE) prezidentiniń orynbasary laýazymyna óz kandidatýrasyn usyný týraly sheshim qabyldady. Bul týraly ol áleýmettik jelilerdegi paraqshalarynda málimdedi.
Foto: chessnokz
FIDE-niń basqarýshy quramyna kezekti sailaý 2026 jyly 26-27 qyrkúiekte Samarqandta, Uiymnyń Bas assambleiasy aiasynda ótedi. Osy kezeńde qalada álemniń túkpir-túkpirinen myńdaǵan grossmeisterler men shahmat súier qaýymnyń basyn qosatyn 46-shy Dúniejúzilik shahmat olimpiadasy da ótkizilmek.
FIDE erejelerine sáikes, prezident pen onyń orynbasary (Deputy President) sailaýǵa ortaq tizimmen túsedi. Osyǵan bailanysty Timýr Týrlov aldaǵy sailaý naýqanyna qatysatyn FIDE-niń qazirgi basshysy Arkadii Dvorkovichtiń komandasynyń quramyna kirdi.
Foto: chessnokz
T. Týrlov atap ótkendei, bul qadam Qazaqstandaǵy ulttyq shahmatty damytý jáne tsifrlandyrý jónindegi jumystyń qisyndy jalǵasy boldy.
«Osy 3,5 jyl ishinde qol jetkizgen nátijelerimiz maǵan myna jaitty anyq kórsetti: bizdiń Qazaqstanda qoldanyp otyrǵan tásilimiz ózin tolyq aqtady, endi ony áldeqaida keń aýqymda, álemdik shahmat deńgeiinde qoldanýǵa bolady», – dep jazdy ol.
Timýr Týrlov Qazaqstan shahmat federatsiiasyn 2023 jyldan beri basqarady. QR Prezidenti Qasym-Jomart Toqaevtyń jáne Federatsiiadaǵy áriptesteriniń qoldaýyna súiene otyryp, ol eldegi búkil shahmat salasyn jańǵyrtýdy bastady. Bul jumys shahmatty mektepterge engizý men óńirlik bailanystardy qaita qurýdan bastap, sporttyq derekterdi tsifrlandyrýǵa jáne respýblika aýmaǵynda FIDE-niń negizgi týrnirlerin ótkizýge deiingi baǵyttardy qamtidy.
Máselen, Qazaqstanda daryndy jastardy qoldaý baǵdarlamasy iske qosyldy, sonyń arqasynda bolashaǵynan zor úmit kúttiretin sportshylar bedeldi mamandarmen jattyǵýǵa, zamanaýi jabdyqtarmen jumys isteýge jáne álemdik jetekshi jarystardyń barlyǵyna barýǵa múmkindik aldy.
«Bilim berýdegi shahmat» respýblikalyq baǵdarlamasy da belsendi damyp keledi, onyń aiasynda bastaýysh synyp oqýshylary óz oqý oryndarynan shyqpai-aq turaqty túrde shahmatpen ainalysady. Búgingi tańda baǵdarlama Qazaqstannyń barlyq óńirlerinde 1 500-den astam mektep pen 60 myńnan astam oqýshyny qamtyp otyr.
Qazirgi ýaqytta Qazaqstanda eń myqty balalar men jasóspirimder quramalarynyń biri jáne eń úzdik áielder komandalarynyń biri qalyptasty. Medaldar sany da turaqty túrde artyp keledi: tek 2025 jyldyń ózinde qazaqstandyq shahmatshylar halyqaralyq týrnirlerde 162 marapatqa ie bolsa, onyń 64-i altyn.
2026 jyly elde shahmat mektepteri men klýbtaryn akkreditteýdiń jańa júiesi iske qosyldy, al qazirgi ýaqytta respýblikalyq shahmat ekojúiesiniń negizgi ózegine ainalatyn KazChess ID biryńǵai tsifrlyq platformasyn tolyqqandy iske qosý daiyndyǵy júrip jatyr.
«Bizdiń komanda shyn máninde halyqaralyq sipatqa ie, al men onda Prezidentimiz birneshe ret atap ótken dál sol «orta derjavanyń» ókilimin. Meniń mindetim FIDE-niń turaqtylyǵy men teńgerimin arttyryp, uiym ishindegi ózara túsinistikti nyǵaitý. Sonymen qatar, jetekshi tehnologiialyq kásipkerlerdiń biri retinde federatsiianyń tsifrlyq damýyna óz úlesimdi qosa alamyn. Osy turǵydan alǵanda, men tek ózimdi ǵana tanytyp otyrǵan joqpyn. Óitkeni búgingi Qazaqstannyń ózi de dál osyndai memleket: tsifrly, tehnologiialyq áleýeti myqty, ornyqty ári kez kelgen tarappen salmaqty da teńgerimdi dialog qura biledi. Halyqaralyq qaýymdastyq ony senimdi seriktes retinde moiyndap otyr. Sondyqtan osy qasietterimizdi tehnologiialyq damýymyz ben turaqtylyǵymyzdy halyqaralyq institýttarǵa da engizgenimiz oryndy dep sanaimyn», – dep atap ótti Timýr Týrlov.
KazChess prezidenti bul sailaýdaǵy jetistik Qazaqstannyń halyqaralyq arenadaǵy bedelin nyǵaityp, elimiz úshin taǵy bir úlken mártebe ári ortaq jeńis bolatynyna senim bildirdi.
Foto: chessnokz
