Qazaqstanda jyl basynan beri áleýmettik mańyzy bar azyq-túlik taýarlarynyń baǵasy ósti. Alaida birqatar taýarlardyń quny arzandap otyr, dep xabarlaidy Ult.kz tilshisi QazAqparat agenttigine silteme jasap.
"Resmi statistika málimetterine sáikes, maýsymnyń sońynda áleýmettik mańyzy bar azyq-túlik taýarlarynyń baǵasy jyl basyna qaraǵanda 7 paiyzǵa ulǵaidy. Aǵymdaǵy jyl basynan beri piiaz - 81,1 paiyzǵa, kartop - 74,9 paiyzǵa, qyryqqabat - 61,2 paiyzǵa, sábiz - 38,1 paiyzǵa, siyr eti - 10,7 paiyzǵa óskeni baiqalady", - dedi QR Ulttyq ekonomika ministri Timýr Súleimenov Úkimettiń búgingi otyrysynda.
Ministrdiń sózine qaraǵanda, onymen bir mezgilde birqatar azyq-túlik ónimderiniń baǵasy arzandap otyr. Máselen, taýyq jumyrtqasynyń baǵasy - 26,9 paiyzǵa, qaraqumyq - 19,7 paiyzǵa, kúnbaǵys maiy - 7,6 paiyzǵa, qant 1,3 paiyǵa tómendedi.
Azyq-túlik baǵasynyń qymbattaýyna birneshe sebep bar. "Ár jyldyń ekinshi toqsanynda turaqtandyrý qorlary azaia bastaidy. Al jańa ónimniń baǵasy qymbat bolady. Budan bólek, biyl piiaz, kartop, qyryqqabat siiaqty azyq-túlik ónimderin Ózbekstanǵa eksporttaý kólemi ulǵaiyp otyr", - dep atap kórsetti Timýr Súleimenov.
