Mektepter men kolledjderde «Kásipkerlik negizderi» degen jańa pán paida bolýy múmkin, dep habarlaidy «QazAqparat» tilshisi.
Jańa pándi qalyptastyrý jaily usynysyn «Atameken» ulttyq kásipkerler palatasy prezidiýmynyń tóraǵasy Timýr Qulybaev Qaraǵandydaǵy kásipkerler palatasynyń óńirlik keńesinde aitty.
«Joǵarǵy synyptar men kolledj stýdentterine «Kásipkerlik negizderi» pánin oqytý qajet», - dedi Timýr Qulybaev. «Atameken» ulttyq kásipkerler palatasy prezidiýmynyń tóraǵasy bul saladaǵy bazalyq bilim jastardyń aitarlyqtai tabysqa ári jetistikke jetýine septigin tigizetinin atap ótti. Sondai-aq, kásipkerler kásibiniń órge domalaýyna kedergi keltiretin birqatar kúrdeli máselelerdi atady. Kóldeneń kedergiler tizimin jiyn barysynda óńirlik kásipkerler palatysynyń direktory Ernar Kúlpeiisov atap berdi.
«Kásipkerlerdiń sheshilmei kele jatqan júieli máseleleriniń biri - bizneske beriletin jer ýchaskeleri jaiy, «jalǵan kásipkerlikten» zardap shegýshilerdiń kontragentterge tólenetin salyqtaryn esepteý, munai bazasy jáne avtokólikterge janarmai quiý stantsiialarynda esepteý baqylaý quraldaryn ornatýdy mindetteý», - dedi Ernar Kúlpeiisov.
Qaraǵandy oblysy deńgeiinde palataǵa jyl basynan beri kásipkerlerdi qorǵaý boiynsha 239 shaǵym kelip túsken. Atalǵan shaǵymdar boiynsha qorǵalǵan quqyqtar somasy 570 million teńgeden asty. Óńirlik keńes otyrysynyń qorytyndysynda atalǵan máselelerdi joiý boiynsha jobalyq sheshimder qabyldandy.
