Ýkraina prezidenttigine úmitker, "Batkivshina" partiiasynyń jetekshisi Iýliia Timoshenko elde "qorǵanys salasyna qatysty júrip jatqan jemqorlyq daýyna" bailanysty "Prezident Petr Poroshenko sailaýǵa qatyspasyn" dep talap etti. Bul týraly Timoshenko 11 naýryzda Joǵarǵy radada málimdedi.
Timoshenko parlamentte ýaqytsha tergeý komissiiasyn qurýdy talap etkenin, biraq bul talaby oryndalmaǵanyn aitty. Qazir qorǵanys salasyna qatysty isti tergeý komissiiasyn parlamenttegi "Petr Poroshenko blogy" basqarady.
Buǵan deiin Prezident Petr Poroshenko qorǵanys salasyndaǵy jemqorlyq isine qatysty quqyq qorǵaýshy organdar 10 qylmystyq is qozǵaǵanyn málimdegen. 11 naýryzda ol Joǵarǵy rada komissiiasy kinálilerdiń aty-jónderin ashyq aitar dep úmittenetinin jetkizgen.
Ýkrainanyń qorǵanys salasyndaǵy jemqorlyq daýy aqpan aiynyń sońynda bihus.info jobasy "Ýkroboronprom" kontsernine qatysty zertteýin jariialaǵan soń paida bolǵan. Jýrnalisterdiń dereginshe, "iske Petr Poroshenkonyń ainalasyndaǵy tulǵalardyń da qatysy bar".
10 naýryzda Kiev pen Cherkassta bul daýǵa qatysty narazylyq mitingileri ótken jáne demonstranttar politsiiamen qaqtyǵysyp qalǵan. Sherýden soń 22 tártip saqshysynyń jaralanǵany aityldy. Ýkraina ultshyldary qorǵanys salasyndaǵy jemqorlyq isine qatysy barlardyń bárin jaýapqa tartýdy talap etken.
Jemqorlyq daýy prezident sailaýynyń aldynda shyǵyp otyr. Ázirge keibir áleýmettik saýalnama boiynsha, sailaýshylardyń kóbi shoýmen Vladimir Zelenskiidi jaqtaidy. Ekinshi orynda - Iýliia Timoshenko, al qazirgi prezident Petr Poroshenko úshinshi orynda tur.
Ýkrainada prezident sailaýy 31 naýryzda ótedi.
