Májilis depýtaty Qazybek Isa memlekettik tilge qatysty depýtattyq saýalyna túsinik berdi, dep habarlaidy QazAqparat.
«Bul másele depýtattyq saýaldan keiin úsh kúnnen soń áleýmettik jelide keńinen talqylanyp ketti. Birshama burmalanyp ketken. Sol kezde jaýap berip, túsindirip jazǵan edim. Atap aitqanda, ol Parlamentte daýysqa túsken eshqandai zań emes, iaǵni «Aq jol» fraktsiiasynyń (27 sáýirdegi) depýtattyq saýalyn jariialaǵan edim. Saýal jariialaǵanda barlyǵy meni qoldap, depýtattar óz qalaýymen qosyldy. Qosylǵandardyń tizimi depýtattyq saýaldyń sońynda jazylǵan», - dedi ol Májilistiń jalpy otyrysynan keiin tilshiler saýalyna jaýap berip.
Óz kezeginde depýtat Azat Perýashev Májiliste ózekti taqyryp boiynsha depýtattyq saýal jariialanǵan kezde, kez kelgen depýtat eshbir shekteýsiz saýaldy qoldai alatynyn eske salǵan.
«Qoǵamda saýaldy qoldaǵan depýtattardy jaqtap, qoldamaǵandardy synǵa ala bastady. Negizi, basqa fraktsiia depýtattarynyń saýalyn qoldaýǵa eshkim mindetti emes. Oǵan qaramastan, basqa fraktsiialardaǵy keibir áriptesterimiz óziniń azamattyq ustanymyn kórsetip, bul saýalymyzdy qoldaǵanyna alǵys aitamyz», - dedi Perýashev.
