Májilis depýtaty Bekbolat Tileýhan jastar jylynda ulttyq kodqa airyqsha nazar aýdarýǵa shaqyrdy, dep habarlaidy Sputnik Qazaqstan tilshisi.
Jastar saiasatyn júzege asyrý máseleleri qaralǵan úkimet saǵatynda depýtat Bekbolat Tileýhan jastar arasyndaǵy birqatar ózekti problemaǵa toqtaldy. Májilismen bir agenttiktiń jastarǵa qatysty júrgizgen zertteýiniń nátijeleri týraly aitty.
"Zertteýge súiensek, Qazaqstandaǵy jastar jumys, kásip degende, oǵan ómiriniń máni retinde emes, tek aqsha tabýdyń kózi dep qana qaraidy. Al negizi kásip adam ómiriniń máni bolýy tiis emes pe?! Qazirgi jastardyń oiy - Astanaǵa kelip, memlekettik qyzmetke ornalasý, iaǵni jastardyń sanasynan jasampazdyq degen nárse ketip bara jatyr. Jastar oqýǵa yntaly emes, kóbi keleshek mamandyǵyn tańdaǵan kezde aǵaiyn-týysqannyń keńesine qulaq asady, jalpylama steoretipterdi negizge alyp, tańdai salady. Jastardyń oqý protsesine formaldy qaraityny jasyryn emes, áiteýir bir diplom alsam boldy dep qaraidy", - dedi depýtat.
Osy oraida Tileýhan urpaqtar sabaqtastyǵyn alǵa tartyp, jastar problemasyn eńserýdiń birneshe jolyn kórsetti. Onyń birden bir joly – ulttyq negizge, ulttyq kodqa oralý.
"Ol seniń genetikalyq jadyńda qalyp qalǵan dúnieler. Mysaly úshin jastar arasynda migratsiialyq kóńil-kúi qyryq protsentke kóterildi deimiz. Eger onyń sanasyna jaqsylap quisaq, "it – toiǵan jerine, er – týǵan jerine" degende adamda namys oiana ma, oianady. Ajyrasýdyń kóbeiýin aityp jatsyzdar. Qazaq aitady "qaityp kelgen qyz jaman, qaita shapqan jaý jaman" dep. Osyny sanasyna sińirýge bola ma, bolady. Biraq, ókinishke qarai, Astananyń oqýshylaryna "prezervativ" taratyp otyrǵanda, myńq etpegen bilim jáne ǵylym ministrliginiń imandy urpaq ósirýge bet buratynyna kúmánim bar. Desek te, bul máseleni de qolǵa alý kerek, bul da bizdiń ulttyq kodymyzda bar nárse", - dedi Tileýhan.
Sonymen qatar, depýtat jastardyń kásipke, eńbekke salǵyrttyǵyna da toqtaldy.
"Qazaqta "taýyp alǵan altynnan, terlep tapqan tiynym berekeli" degen sóz bar. Osyny ne arqyly sińiremiz? "Rýhani jańǵyrý", "Uly dalanyń jeti qyry" arqyly sińetin nárse. Biyl jastar jylynda dástúrge, ulttyq negizge, ulttyq kodqa burylý degen máselege tereńirek kóńil bólýdi usynar edim", - dep qorytty sózin májilismen.
