Til – halyqtyń jan dúniesiniń ainasy, jandanyp, jańara beretin, máńgi qulamaityn báiterek tárizdi. Týǵan tildi tuǵyrym dep bilip, maqtan etý, ony lastamai, taza ári kórkem túrinde saqtaý kez kelgen jannyń paryzy, abyroily boryshy. Al, ózge ult ókilderiniń qazaq tilin meńgerip, erkin sóileýi – tilge, elge degen qurmet, asa bir syilastyq dep bilgen jón. Birlik pen tatýlyqtyń negizi Toraiǵyr aýylynda aiqyn ańǵaryldy. Aiadai ǵana Toraiǵyrda, aiadai emes, tarihy qalyń, tamyry tereń Toraiǵyr aýylynda qazaqy mádeniet qaita jańǵyrdy.
Ekibastuz qalasynan bastaý alǵan «Til kerýeni» festivali Toraiǵyr aýylynda asqan sán-saltanatpen aiaqtaldy. Kerýenniń kelisti núktesi Toraiǵyr aýylyndaǵy etnoaýylda qoiyldy. Qazaqtyń ejelgi mádenieti kórkem de kelisti ǵurpy kópshilik nazaryna taǵy bir márte, myń márte usynyldy. Qutty kerýenniń qurmetti qonaǵy oblys ákimi Bolat Baqaýov etnoaýyldy aralap, kelbetin tamashalady. Oblys basshysyna «Ana tili» ortalyǵynyń direktory Sholpan Kinjikova etnoaýyldyń kórinisi men kórkimen tanystyrdy.
Etnoaýyldaǵy toǵyz kiiz úi ejelgi zamannyń kelbetin kóz aldymyzǵa boiamasyz ákeldi. Toraiǵyr aýylynyń ásem tabiǵatymen baǵzy zamannyń baiyrǵy mádenieti ushtasqanda iisi qazaqtyń, kóne dáýirdiń úni estilip, samaly eskendei áserde qaldyq. Alyp tulǵaly erler batyrdyń saýytyn kiip, qanjaryn ustaǵan. Burymdy qyzdar qazaq kóilegin ústine jarastyra kigen. Ulttyq aspaptar da sharanyń sánine sán qosyp, merekeniń kórkin qyzdyra túskendei. Oblys ákimi oblysymyzdyń túkpir-túkirinen kelgen kerýendi tamashalady. Baianaýyldyń ásem tabiǵatyn aq paraqqa túsirip, sóilete syr shertken sýreshtiler, qazaqtyń kóne qural-jabdyqtary men aspaptaryn aǵashtan túiin túigendei oiýlaǵan qolóner sheberleri, talantty ártister men kúmis kómei ánshiler. Bári, bári qazaq degen ǵajap jurttyń tynysy men turmysyn kórsetpekke kelgen. Ózge ult ókilderi bastaǵan kerýen qazaq tiliniń mártebesin asqaqtatyp, mereiin ústem ete tústi. Pavlodar, Ekibastuz, Aqsý qalalarynan jáne Ertis, Qashyr, Aqtoǵai, basqa da aýdandardan kelgen ónerpazdar dostyq, týysqandyq jáne birlik týyn joǵary kótere óner kórsetti. Ulttyq mádeniettiń jańǵyrýyna ún qosyp, tektiliktiń tizginin ustaǵandar kerýenniń sánin keltirdi.
Patriottyq ánder shyrqalǵanda taý men tastar da kúńirene ún shyǵarǵandai. Árbir tasy syr saqtap, tarihtyń qalyń betterin qurastyratyn Toraiǵyr aýyly «Til kerýeninde» ata-baba mádenietin tizbektei kórsetip, kiiz úide turǵan kóshpendi halyqtyń mádenietimen tanystyrdy. Úilerdiń janyndaǵy oshaqta baýyrsaq pisirip, ulttyq et taǵamy – sirneden aýyz tigizdi. Qoiýlatyp shai usynyp, merekelik kontsertti halyq nazaryna usyndy.
Kerýen kóshi tizilgende halqymyzdyń ǵajap ta kórkem mádenietiniń, kelisti turmysynyń kelbeti kóz aldymyzdan ótti. Munyń barlyǵy da tilge degen yntyzar kóńil men Otanǵa degen ystyq mahabbat dep túsindik.
Áliia TAÝKENOVA
