Qyzylorda oblysynda tikushaq apatynan qaza tapqan áskerilerdiń otbasyna marqumnyń bes jyldyq jalaqysy tólenedi. Sonymen qatar, eger páteri bolmasa, jańa baspanamen qamtylady. Bul týraly qorǵanys ministriniń orynbasary Talǵat Muhtarov málimdedi, dep habarlaidy Sputnik Qazaqstan tilshisi.
"Qaiǵyly oqiǵa bolǵan kezde qaza bolǵan áskerilerdiń otbasyna áskeri qyzmetshiniń bes jyldyq jalaqysy tólenedi. Zańǵa sáikes, eger marqumnyń otbasynyń baspanasy bolmasa, onda biz jańa baspana alyp berýge mindettimiz", - dedi Muhtarov májilis kýlýarynda.
Ol ár áskeri qyzmetshiniń jalaqysy ártúrli ekenin atap ótti.
"Bastapqy laýazymdardaǵy ofitserdiń jalaqysy ortasha eseppen 140 myń teńge. Al kelisimshartpen jumys isteitinderdiki azdaý, 60-70 myńdai", - dedi ministrdiń orynbasary.
Sonymen qatar, Muhtarov áskerilerdiń otbasy qaraýsyz qalmaitynyn atap ótti.
"Bizdiń ujym marqumdardyń otbasymen bailanysta bolady, múmkindiginshe kómek kórsetedi",- dep sendirdi ol.
Buǵan qosa, zańda áskeri qyzmetshilerdiń balalaryna áskeri oqý oryndaryna túsken kezde jeńildikter qarastyrylǵan. Eger otbasynda áskeri qyzmetshi qaza tapqan bolsa, onyń aǵa-inileri áskeri qyzmetke shaqyrylmaidy degen norma da bar.
Muhtarov tikushaqtyń naqty neden qulaǵany ázirge belgisiz ekenin, tergeý júrgizilip, "qara jáshiktegi" málimetter tekserilip jatqanyn aitty.
Aita keteiik, 27 naýryzda keshke Qyzylorda oblysy Jalaǵash aýdanynda Mi-8 tikushaǵy apatqa ushyrady. Áýe kemesi belgisiz sebeptermen qulap, túgi qalmai janyp ketken. Áskeri tikushaqtyń bortynda 13 adam boldy, olardyń barlyǵy qaza tapty.
