Búgin áskeri aviatsiia tikushaǵymen QR Qorǵanys ministri Nurlan Ermekbaev Mi-8 tikushaǵy apatqa ushyraǵan jerge bardy, dep habarlaidy "Ult aqparat".
Qorǵanys ministrliginiń baspasóz qyzmetinen málim etkendei, vedomstvo basshysy apat ornynda jumys istep jatqan mamandardyń baiandamasyn tyńdady.
«Sapar barysynda Qorǵanys ministri: Apat sebebi tolyq anyqtalǵansha bir tipti tikushaqtardyń (MI-8, MI-17, MI-171) ushýlaryn ýaqytsha toqtatýdy, sondai-aq «Altyn Jebe» jattyǵýlary kezinde atalǵan tikushaqtardy qoldanýdy toqtata turýdy; aviatsiialyq apattyń jan-jaqty ádil tekserilýin uiymdastyrýdy jáne ótkizýdi, reisti júzege asyrýǵa tartylǵan barlyq qyzmetter men laýazymdy tulǵalardyń áreketterin baǵalaýdy jáne aviatsiialyq apatqa ákep soqqan barlyq jaǵdailardy belgileýdi tapsyrdy, - delingen habarlamada.
Sonymen birge, ministr qaýipti aýa raiy qubylystaryna ushyraǵan jaǵdaida, ushý jáne injenerlik-tehnikalyq quramdarmen qosymsha trenaj uiymdastyrýdy buiyrdy. Odan bólek, sot saraptamasyn júrgizý, tergeý organdarymen kelisim jasai otyryp, máiitterdi jerleý oryndaryna jetkizýdi qamtamasyz etý týraly buiryq berildi.
«Jergilikti atqarýshy organdarmen birlesip, jerleýge arnalǵan jer telimderin bólý máselesin sheshý jáne áskeri ádet-ǵuryptardy saqtai otyryp, áskeri qyzmetshilerdi jerleý kerek. Áleýmettik kepildikterdi qamtamasyz etý men qaza bolǵan áskeri qyzmetshilerdiń jaqyndary men týystaryna psihologiialyq, materialdyq jáne basqa da kómek kórsetýge, zańmen belgilengen barlyq áleýmettik kepildikter men tólemderdi júzege asyrýǵa erekshe kóńil bólinedi», - dep habarlady ministrliktiń baspasóz qyzmetinen.
Áskerilerdiń otbasylaryna kómek pen qamqorlyqty uiymdastyrý men áleýmettik máselelerdi sheshý úshin komandalyq quramnyń arasynan jaýapty laýazymdy tulǵalardy taǵaiyndaý týraly sheshim qabyldandy. Qorǵanys ministrliginiń arnaiy qurylǵan komissiiasy qaiǵyly oqiǵa ornynda óz jumysyn jalǵastyrýda.
