videodan alynǵan kadr
TikTok-ta qumar oiyn uiymdastyryp, 13 million teńge qarjy tapqan almatylyqtar 1,5 jylǵa sottaldy, - dep habarlaidy "Ult aqparat" Qarjylyq monitoring agenttiginiń baspasóz qyzmetine silteme jasap.
Vedomstvo málimetinshe, qazirgi ýaqytta TikTok jelisinde qumar oiyndar zańsyz taralyp jatyr.
"Negizinen bul - karta oiyny, súiek laqtyrý jáne onlain rýletka. Barlyq jerde printsip birdei. Bás tigýge shaqyrady. Onyń tórtten biri uiymdastyrýshyda qalady, qalǵanyn jeńimpaz alady. Bás tigýlerdi qabyldaý jáne utystardy berý banktik onlain aýdarymdar arqyly júzege asyrylady.
Jelilik taldaý nátijesinde biz onlain oiyndy taratatyn 100-den astam akkaýnt anyqtadyq", - delingen QMA habarlamasynda.
Vedomstvo ókilderi uiymdastyrýshylar men qatysýshylardyń áreketteri zańsyz ekenin, QR QQ 307-babynda zańsyz oiyn biznesin uiymdastyrǵany úshin jaýapkershilik qarastyrylǵanyn atap ótti. Qazirdiń ózinde sottalǵandar bar.
"Mysaly, TikTok jelisinde qumar oiyn uiymdastyrǵan Almaty qalasynyń 2 turǵyny 4 aida 13 million teńgege jýyq tabys tapqan. Tergeý qorytyndysy boiynsha olar 1,5 jylǵa bas bostandyǵyn shekteý jazasyna kesildi. Sonymen qatar, qazirgi ýaqytta sot TikTok jelisinde uqsas mazmundaǵy kontent úshin 4 uiymdastyrýshyǵa qatysty is qaralyp jatyr", - delingen habarlamada.
Agenttik ókilderi qyraǵy bolyp, osyndai qumar oiyndarǵa aralaspaýdy surady. Sebebi bul zańǵa qaishy. Sondai-aq, ata-analar balasynyń minez-qulqyna, onyń kóretin kontentine jáne onyń onlain saýdasyna nazar aýdarýy qajet.
