Jambyl oblysynda TikTok áleýmettik jelisi arqyly jihaz satamyn dep turǵyndy aldaǵan áiel 2 jyl 6 aiǵa bas bostandyǵynan aiyryldy. Bul týraly Jambyl aýdandyq soty habarlady, dep habarlaidy ult.kz.
Is materialdaryna sáikes, 2026 jyldyń sáýir aiynda sottalýshy ózin jihaz satýshy retinde tanystyryp, TikTok jelisinde divan satý týraly habarlandyrý jariialaǵan. Jarnamadaǵy aktsiiaǵa qyzyqqan jábirlenýshi satýshymen bailanysqa shyǵyp, 60 myń teńge turatyn divandy satyp alýǵa kelisken.
Sot málimetinshe, kúdikti aldyn ala tólem qajet ekenin aityp, satyp alýshyny 25 myń teńgeni úshinshi tulǵanyń bank shotyna aýdarýǵa kóndirgen. Alaida aqshany alǵannan keiin divan jetkizilmei, satýshy bailanysqa shyqpaǵan.
Ózin alaiaqtyqtyń qurbany bolǵanyn túsingen áiel quqyq qorǵaý organdaryna aryzdanǵan.
Sotta sottalýshynyń kinási jábirlenýshi men kýálardyń aiǵaqtarymen, bank túbirtekterimen jáne is boiynsha jinalǵan ózge de dáleldemelermen tolyq rastaldy.
Sondai-aq sot onyń buǵan deiin de birneshe ret alaiaqtyq qylmysy úshin jaýapqa tartylǵanyn, alaida tiisti qorytyndy shyǵarmai, jazasyn óteý kezeńinde qaitadan osyndai qylmysqa barǵanyn eskerdi.
Sot úkimimen áiel Qylmystyq kodekstiń 190-baby 2-bóliginiń 4)-tarmaǵy boiynsha kináli dep tanylyp, úkimderdiń jiyntyǵy negizinde 2 jyl 6 ai merzimge bas bostandyǵynan aiyryldy.
Úkim zańdy kúshine endi.
