Qazaqstanda bailanys quny álemdegi eń tómen tólemderdiń biri sanalady. Naryq erejelerine sai ol birshama joǵary bolýy tiis. Mundai pikirdi QR Tsifrlyq damý, innovatsiia jáne aeroǵarysh ónerkásibi ministri Baǵdat Mýsin bildirdi, dep habarlaidy QazAqparat.
Onyń aitýynsha, arzanshylyq saldarynan bailanys bazalyq stansalaryn ornatýǵa investitsiia tartý protsesi kúrdelenip otyr. Olardyń quny 100 myń dollarǵa jetedi. Al olarǵa qyzmet kórsetý odan da qymbatqa túsedi.
«Ekonomika turǵysynan alǵanda eger siz biznesmen retinde paida tabý úshin bazalyq stansa ornatpaq bolsańyz, onda ol – tiimsiz. Eger siz aýylǵa bazalyq stansa ornatsańyz, 200 adam 2 myń teńgeden tóleidi. Ol qansha bolady? Bazalyq stansa júzdegen myń dollar bolsa, qyzmet kórsetý odan da qymbat (...). Eger ekonomikalyq kórsetkishterge qarasaq, naryq erejesimen júrsek, onda olar (bailanys operatorlary) baǵany kóterý kerek. Al biz olarǵa: «Joq, toqtańyzdar. Bul áleýmettik másele» dep otyrmyz», - dedi Baǵdat mýsin Májilis depýtattary men bailanys operatorlary ókilderine arnalǵan ashyq esik kúninde.
Onyń málimetinshe, sońǵy 2-3 jyldyń ishinde derekter trafigi 100 paiyzǵa artqan. Bazalyq stansanyń naqty bir ótkizý qabileti bar ekendigin eskerer bolsaq, onda trafik jyldan-jylǵa artyp keledi. Al TikTok-tyń keńinen tanymal bolýyna bailanysty bailanys arnalaryna júkteme de aitarlyqtai arta túsken. Sondyqtan da ministrlik trafikterdi jikteý múmkindigin qarastyryp jatyr.
«Videotrafikke baǵa sál kóterilýi tiis. Sóilesýge, WhatsApp-pen hat almasýǵa soma az bola bersin. Nelikten kúni boiy úiinde TikTok pen YouTube kóretinder men kúni boiy bazarda jumys istep, biznes júrgizetinder birdei 3 myńnan tóleýi tiis? Onda olar jeke tólesin. Óitkeni olar qosymsha júkteme jasap otyr», - dedi ministr.
