Belarýs oppozitsiiasynyń jetekshisi Svetlana Tihanovskaia narazylardyń Aleksandr Lýkashenkoǵa ýltimatým jariialap, birneshe talap qoiǵanyn málimdedi. Belarýstiń burynǵy basshysy olardy 25 qazanǵa deiin oryndaýy tiis.
Tihanovskaianyń Telegram arnasynda jazylǵan málimetke súiensek, narazylar Lýkashenkonyń otstavkasyn, beibit sherýge qatysqandarǵa kúsh qoldanýdy toqtatý jáne saiasi tutqyndardy bosatýdy talap etip otyr.
Tihanovskaianyń jazýynsha, eger bul talaptar oryndalmasa, 26 qazanda "barlyq kásiporyndarda ereýil bastalyp, joldar jabylady, memlekettik dúkenderde saýda toqtaidy".
"Úsh shartymyzdy oryndaý úshin sizge 13 kún beremiz. Bizde daiyndalýǵa 13 kún bar" dep jazdy Tihanovskaia.
Ol biliktiń oppozitsiiamen dialog ornatpai otyrǵanyn synap, olardyń áreketin "memlekettik terror" dep atady. Ol sonymen birge quqyq qorǵaý organdaryn "halyq jaǵyna shyǵýǵa shaqyrdy".
- Belarýste Lýkashenkoǵa qarsy narazylyq aktsiiasy 9 tamyzdan beri jalǵasyp keledi. Narazylar sailaý qorytyndysy burmalandy dep sanaidy. Lýkashenkonyń basty qarsylasy Tihanovskaia bilik qysymymen elden ketýge májbúr bolǵan. EO elderi sailaý qorytyndysyn moiyndamady. Osyǵan deiin Tihanovskaia oppozitsiia jetekshisi retinde Eýroodaq elderiniń birqatar basshylarymen kezdesken.
- Sońǵy kúnderi arnaiy jasaqtyń Minsk men eldiń ózge qalalaryndaǵy narazylyq aktsiialarynda qaitadan kúsh qoldana bastaǵany baiqalady. Jeksenbi kúni Belarýste 400-den astam adam ustaldy, militsiia narazylarǵa sý shashyp, burysh búrkip, arnaiy qural qoldandy. Dúisenbi kúni Minskide "Zeinetkerler marshy" taratyldy.
