Belarýstegi prezident sailaýyna qatysqan oppozitsiia kandidaty Svetlana Tihanovskaia Eýropa keńesine málimdeme jasap, Belarýstegi prezident sailaýynyń qorytyndysyn moiyndamaýǵa shaqyrdy. Aǵylshyn tilinde jazylǵan videomálimdeme Youtube-tegi "Strana dlia jizni" arnasynda jariialandy.
Tihanovskaianyń aitýynsha, 9 tamyz kúngi prezident sailaýy ashyq, ádil ótken joq, onyń qorytyndysy burmalanǵan. Al daýysyn qorǵaýǵa tyrysqan halyqty bilik aiaýsyz uryp-soǵyp, túrmede azaptaǵan.
"Júzdegen adam jaraqattandy, keminde eki adam qaza boldy. Mundai jaǵdai dál qazir Eýropa tórinde bolyp otyr. Sizderdi ádiletsiz sailaýdy moiyndamaýǵa shaqyramyn. Lýkashenko halyq aldynda, búkil álem aldynda ókiletin joǵaltyp aldy" dedi Tihanovskaia.
Ol sonymen birge eldegi bilikti beibit túrde aýystyrý úshin úilestirý keńesin qurǵanyn, elde halyqaralyq baqylaýshylardyń qatysýymen demokratiia standarttaryna sáikes keletin sailaý ótýi tiis ekenin aitty.
"Men sizderdi Belarýstiń oianýyn qoldaýǵa shaqyramyn. Barlyq memleketterdi halyqaralyq quqyq printsipterin qurmetteýge úndeimin. Belarýs egemendigi men belarýs halqynyń tańdaýyn qurmetteýge shaqyramyn" dedi Tihanovskaia málimdemede.
19 tamyzda Eýropa keńesi Belarýstegi jaǵdaiǵa bailanysty kezekten tys videosammit ótkizedi.
Buǵan deiin Ulybritaniia, Kanada, Irlandiia, Latviia, Litva, Estoniia jáne Eýroodaqtyń 27 eliniń syrtqy ister ministrleri Belarýstegi sailaýdyń qorytyndysyn moiyndamaitynyn málimdegen.
